متضايق من اسمك؟!..ولا يهمك إنت أقل واحد بتستخدمه!!

في البداية.. العروسة للعريس والجري للمتاعيس، والعاقبة عندكم في المسرات، وهيعيشوا في تبات ونبات، ويجيبوا صبيان وبنات، وسلم لي ع العسيلي..هنا مربط الفرس – مش العسيلي طبعا - المربط هو المولود اللي هيجي يا ترى اسمه هيبقى إيه ؟!.. أقول لكم أنا بقى عن الحوار ده:
بين نفوسة وعطوة .. يا قلبي .. احزن !
الأم :- أنا هسميها على اسم ماما "نفوسة".
الأب:- لا لا ..سميها علي اسم أحدث من اسم حماتي ..خليها "نفيسة" .
الخالة:- يا سلام.. هي فرقت "نفوسة من نفيسة"؟!.. الاتنين زفت... سموها اسم كده عشان تعيش.. يعني خليها "كنكة"!!
العم:- "كنكة" إيه و"جردل" إيه؟ لازم اسمها يبقي على اسم ولد عشان المولود اللي بعدها يبقى ولد.. سمّوها "عطوة" على اسمي!!
عطوة كبرت يا ولاد!!
وتكبر "عطوة"، وتدخل المدرسة، ويجيلها عقدة من اسمها، وتبقى عايزة تقتل عمها، وبعدين تدخل الجامعة فيجيلها اكتئاب من "عطوة و"مطوة" (اسم دلع أطلقه عليها أصحابها)!
كسوف ولا خوف !!
أصبح الكسوف من الاسم توقعاً لسخرية الجميع والهجر بين كل حبيبين، ويدخل الاسم ليزيد من مشكلة العنوسة، فيترك العريس عروسه لأن اسمها مش ولا بد!!.. قال يعني مش ع الموضة أصل العروسة مفيهاش غير اسم!
زكية والشهرة بسمة !
أنا اسمي كان على اسم جدتي (زكية)، لكنه قديم جدا، وأصبح جميع من حولي يسخرون منه، فقررت تغييره إلى اسمي الحالي "بسمة"، عشان جميل وع الموضة ويكون اسم دلع وأثبته في السجل المدني بعد طول عناء، واللي هيناديني يا "زكية" هقتله زي ما قتلت "زكية".
بسمة محمد ((17 سنة))
نفيسة من غير دلع !
أنا اسمي على اسم جدتي، لكن أهلي رافضين تغييره، أو حتى مناداتي باسم دلع، لأن ده عيب، والمفروض إن كل واحد يتقبل ما فرض عليه، ويتعايش معه، بس بجد أنا في حالة نفسية سيئة، بعد ما سمعت ما لا تقبله أذن من زملائي، ومش عارفه أعمل إيه!
نفيسة إبراهيم- 18 سنة
اسمي بستخدمه في الأوراق بس !
أنا اسمي مش مسبب لي مشاكل، أصله ع الورق بس، لكن الكل عارف إن اسمي "نسمة" لأني زي النسمة!! عشان كده أنا ماعنديش مشكلة.
خضرة السيد - 18 سنة
اسمي سيدهم ومش متضايق !
بصراحة أنا مش فاهم أهلي سموني "سيدهم" ليه!، رغم إني ماليش إخوات عشان أبقى "سيدهم"!!، هو أنا فاهم معناه إيه أصلاً؟.. بس أنا ولد، ولازم أكون راجل وما أتكسفش ولا أخاف من حاجة، هو أنا كنت اخترت أهلي وعيشتي لما أختار اسمي؟! بلاش أسيب مشاكل الدنيا كلها وأدور على مشكلة اسم.
سيدهم عبد الكريم - تربية رياضية
عليش زهقان !
أنا زهقت من اسمي ده، مش عارف إيه حكايته؟؟ أهلي بيقولوا عشان أعيش، وأصحابي يقولوا أنا أموت لو ده اسمي، وأنا متلخبط بين الاثنين، وبصراحة ماعنديش رد!!
عليش احمد حسين - 20 سنة
بالمناسبة كان فيه واحدة اسمها " نجفة " وغيرته ل "نور" ( أهو كله بالكهرباء) بس رفضت تتكلم معايا!
وآخرتها إيه ؟!
وهناك من يشكي لأن اسمه طويل زي "أشكيناز"، أو جديد زي"الهانوف"أو..أو.. أو...
والواقع أننا لا نرضى عن شيء مهما كان وبنفضل ندور في ساقية عمرها ما هتقف لإن ملهاش آخر، وكل واحد فينا له ميزة بعيد خالص عن اسمه، وكل واحد فينا ممكن يكون اسمه ميزة فيه، لكن مش هو اللي يسبب لنا أزمة أوعقدة نفسية.. فيه حاجات أهم من كده، بالرغم من إني عارفن مشكلة الاسم في الحقيقة أكبر مما نعتقد، لكننا نستطيع التغلب عليها بأي حال.