أحمد سعيد: التجربة الصينيه

زمان لما كنت صغير كنت منبهر جداً بأختراع جاء من بلاد الفرنجة أسمه القلم الجاف أبو لونين و دايماً كانوا أحمر و أزرق، أزرق عشان ده كان اللون الرسمي للكتابة في المدارس (مش عارف الأخضر ماله يعني) و الأحمر عشان ده كان اللون الرسمي للتصحيح في المدارس مع أن اللون المناسب للمدرسين و التصحيح هو اللون الأسود و كان دايماً المدرسات بيَاخدوا مننا الأقلام اللى بلونين غصم و إقتدار وأحنا طبعاً ما كنَاش بنعرف نعمل حاجة.
اللي لفت النظر للقلم ذو اللونين أنك تدوس على زرار الأزرق فتلاقي الأنبوبة بتتحرك جوه القلم و تطلع من الفتحة كان إبداع و تبقى مثلاً فاتح القلم على اللون الأزرق و تدوس ع الزار الأحمر فتلاقي اوتوماتيك الأزرق طلع لوحده والأحمر جه مكانه إيه الحلاوة دي ده خلاص أحنا اتقدمنا كده جامد و دايماً كنت بلاقي ستيكر ملزوق مكتوب عليه بخط أسود Made In China و الخلفية لونها ذهبي في السكول اتعلمنا ان Made يعني صنع و In يعني في China بقى يعني أحنا نسأل في براءة عن China يقولوا لينا إنها دولة تانية غير أم الدنيا طب فين مكانها عشان نشكرهم و نبوسهم من هنا و من هنا يقولونا دي بعيدة و في قارة تانية فنزعل جامد.
نرجع نعيش مع الأقلام و الكتاب و الكشاكيل و المدارس و المدرسين و اذ فجأة كحجر اتضرب في مياه المجاري و طرطشت تصدقوا اتعمل قلم أبو 3 ألوان كان ده شيء عظيم جداً و إنجازه لا يقل عن انجاز نوبل و لو كان بأيدينا كنا ادينا للراجل اللى عمل القلم أبو 3 ألوان جايزة نوبل بس مش للسلام للأقلام ده الراجل المفروض تمجده كل كتب التاريخ ما تستهونوش بالموضوع ده قلم ب 3 ألوان أزرق و أحمر و أسود و بنفس تقنية القلم أبو لونين يا سلام و الله المفروض كانوا يدونا أجازة يوم ما القلم ده نزل البلد و يبقى عيد القلم أبو 3 ألوان و نقضيها كشري للصبح و برضه نفس الستيكر موجود على القلم Made In China و يزداد شوقنا للصين ياجماعة حد يجيبهالي أبوسها برضه بعيدة بجد حاجة تزهق
بعد شوية صغيرين القناة التانية بتعرض مسلسل غريب سألنا مسلسل ايه ده قالوا مسلسل صيني كان فاضل شوية و نعمل فرح للصين كمان جت في التليفزيون لأ و ايه بيتكلموا عربي (اتصدمنا بعد كده و عرفنا انه مدبلج) بحبك يا صين و نتابع المسلسل و نشوف طريقتهم في الاكل بالعصيان و نحبهم أكتر ليه؟ عندنا بيستخدموا العصيان للضرب (سوء استخدام بعيد عنكم) و في الصين بياكلوا بيها لأ و إيه بيوفروا جامد عندنا العصيان طويلة و علي الفاضي هناك لو معاهم عصاية زى اللى ماسكها الأستاذ هيقسموها و هتكفي المسلسل كله و ممكن تفيض و الأبطال ياخدوها بيتهم ياكلوا بيها أه يا صين ما تيجي بقى عايز أبوسك من هنا و من هنا أومال ايه بقى الأرض بتدور ما بتدورش ليه و تجيب الصين لحد عندنا
بعد الموضوع ده بشوية عملت الصين المعجزة عملت الحاجة اللى خلت كل فئات الشعب يحبها بس المفروض كان الخبر ينزل في كل وكالات الأنباء العربية و العالمية و ممكن يبقى كده
((قامت دولة الصين الشقيقة بأختراع قلم جاف بأربع ألوان أزرق و أحمر و أسود و أخضر))
أه و الله حصل نزل قلم بأربع ألوان و الشعب عاش أحلى أيام حياته بالأربع ألوان و وقتها الواحد حس إن البشرية خلاص جابت أخرها في الأختراعات و العلم و كالعادة نفس الستيكر اللى بيعقدني Made In China صييييييييييييييييييييييييييييييين أى لوف يو
بدأت أفكر أكلم الناس اللى عندنا في المدرسة نقول بعد تحيا جمهورية مصر العربية تحيا جمهورية الصين الشعبية و أهو الجملتين شبه بعض بس قلت أكيد هيفتكروني جاسوس للصين فأثرت السلامة و كتمت مشاعري ناحية الصين بس في نفس الوقت بحب مصر جداً ومؤمن إن مصر هي أمي بس كده يا ست الحبايب ما تعمليش لأبنك الصغير قلم رصاص حتى و الله كنت هرضى كده خلتيني أبص لبره على دول شقيقة
بعد ما كبرت شوية عرفت إن الصين بتحب الفلوس و معرفتها ليا معرفة مصلحة و انقلبت مشاعر الحب اللى عندى للصين لمشاعر الكره و باين الكره ده وصل للأقلام اللى أكتر من لون و اللى منها انتحر (طرش) و اللى منها جتله سكتة قلبية (فضي) لدرجة أن بدأ يجيلي كوابيس أن كل حاجة Made In China عندنا بيتحكموا فيها من هناك و هيخلوها تقوم عليا و تضربني و تموتني و برضه الكترة تغلب الشجاعة طيب يا صين أنا رافض التجربة الصينية تسقط الصين و تحيا جمهورية مصر العربية من غير حتى ما تصنع أستيكة.