يارب

يابني أنا هنصحك واسيبلك قبل ما موت ثروة
كلمة ''يارب" تشيل هموم..
تمسحها وتِدّيك القوة
قول: ''يارب''
في كل وقت..
قول: ''يارب''
لو كنت فلاح في أرض مش أرضك...
طافح الكُوته ومش لاقي حد يشيل غُلبك..
قول: ''يارب!''
لو قابلك قاطع طريق وقال: هات التمن..
تمن الزمن..
لاتموت لاتدفع.. ولاّ الحياة من غير تمن؟!
قول: ''يارب''
لو ضعفت أو انكسرت أو زهقت..
في أي وقت..
قول: ''يارب''
قول: ''يارب'' لو شفت وطنك في إيد احتلال
يمص دمّك.. يعض قُوُتَك.. وراحة البال..
قول: ''يارب''
لو اتظلمت ونهش حقك إنسان قوي..
قول: ''يارب ياقوي''
يبقى اللي ظلمك بينكوي..
قول: ''يارب'' لو شفت غمه في ليل وكرب..
قول: ''يارب'' لو شفت مر أو شفت غُلب..
قول: ''يارب'' لو شفت نفسك ضعيف وعاجز..
قول: ''يارب'' ده أنت عالم بيّا شايف..
قول: ''يارب'' لو غضبت أو زعلت واتضايقت.
قول: ''يارب'' في كل لحظة وكل وقت.
كلمتنا – مايو 2001