دراما الكلام...لأحمد سعد

لو نحسبها بالورقه و القلم كده .... مش هنلاقى في حياتنا اكتر من الكلام ....
مهما قارنت الكلام اللى في حياتك بأى حاجه تانيه هتلاقى الكلام اكتر بكتير
كلامك مع نفسك اكتر من سكوتك ...........كلامك مع اصحابك اكتر من ضحكك ....كلامك مع اللى بتحبه اكتر من فرحك معاه
كلامك اللى جواك و لسه مقلتهوش اكتر بكتير من اللى هتقوله و اللى قلته......مش بيخلص مهما حاولت
إذا ......عيشتنا كلها عبارة عن كلام يتخلله حياه
و احسن متعة مع الكلام اللى مالى عليك حياتك و محاوطك من كل حتة إنه يطلع .....يشوف النور ....
كل الدراما اللى جواك ....كل افكارك اللى صاحية و اللى نايمة ....كل نظرة ليك لكل شئ ....تعليقك على كل حاجه ......
خليه يطلع يشوف براح و يسيب براح جواك لكلام غيره ....يطلع في الهوا ..... يطلع في مكان نور حتى لو كنت لوحدك فيه ....مش مهم يكون فيه حد فاهم ....او سامع ....مش مهم...
سيبه يطير .....يخبط في دماغ حد !!..... يجى على جرح واحد ......يعلق مع غيرك .....او يتجالهه الناس ....كلمة تخبط في عين حد و تنزل دمعة فرح او شجن ....او تشبك في شفايف فتفتحهم ببسمه .....توصل لمشاعر تحركهم
لا مهم يكون شكله حلو ولا متزوق .....
بس المهم إنه يبقى بتاعك ...طالع منك و عليه بصمتك انت ....
الكلام مش بس طريقه تعبير ..قد ماهو طريقه تغيير
مش بيغير في اللى بيسمعه او يفهمه قد ما بيغير اللى بيقوله
بيحفر جوة صاحبه علامات كتير قبل ما يطلع يدور في عقله او يطلع على لسانه او حتى يدوب بين طرف قلمه و الورق....
طلع الدراما اللى جواك .......و جسدها قدامك .......ومش هتندم ........