في العيد 6 افلام كلهم كوميدي بميزانية 50 مليون جنيه تقريبا

ماراثون أفلام العيد السينمائى قرب يبتدي ب6 أفلام كوميدية ميزانيتها 50 مليون جنيه تقريباً وهتتعرض فى 300 دار عرض.
فى مقدمة أفلام العيد "تك تك بووم" للنجم محمد سعد، اللىبيشارك لأول مرة في موسم عيد الفطر, وده لأن سعد متعود يعرض افلامة في موسم الصيف سعد لأول مرة هيقدم فيلم من تأليفة وبيتعاون لأول مرة مع الشركة العربية لأنتاج الفيلم, سعد بيحاول عن طريق "تك تك بوم" انه يقدم نفسه بشكل مختلف.
بيشارك سعد بطولة الفيلم درة ومحمد لطفى وسليمان عيد ولطفى لبيب، والفيلم إخراج أشرف فايق و قررت الشركة المنتجة طبع أكتر من 100 نسخة للفيلم عشان ينجح فى أيام العيد التلاتة فى حصد أكبر نسبة من الإيرادات، و كتبت فكرة الفيلم الفنانة إسعاد يونس، رئيس مجلس إدارة الشركة المنتجة والموزعة للفيلم .
الفيلم التانى فيلم "شارع الهرم" اللى بيتعرض فى 70 شاشة، وبيقوم ببطولته سعد الصغير ودينا، وانتاج أحمد السبكى اللي نجح خلال السنين اللي فاتت بثنائي سعد ودينا فى تحقيق أعلى الإيرادات بعد نجاح فيلم "ولاد البلد" اللي كانت إجمالى إيراداته 9 ملايين جنيه، وبيشارك فى بطولة فيلم " شارع الهرم " أحمد بدير ومها أحمد، ولأول مرة المطرب طارق الشيخ وآيتن عامر، والفيلم تأليف سيد السبكى وإخراج محمد شورى.
وتالت الافلام هو " بيبو وبشير"اللي هنشوف فيه لاول مرة الفنان آسر ياسين "كوميديان" وهتشاركه البطولة الفنانة منة شلبى، وبتدور أحداث الفيلم فى جو كوميدى رومانسى فى كل المواقف اللى بتجمع بين "بيبو" منة شلبى، و"بشير" آسر ياسين، وكان في رغبة من صناع الفيلم تغير اسم الفيلم بس في النهاية أستقروا علي بيبو وبشير.
والفيلم الرابع هو فيلم الفنان الشاب نضال الشافعى " يانا يا هو" وهو أول بطوله سينمائية لنضال وبيشاركوا البطولة ريم البارودي و نيرمين ماهر والفيلم من اخراج تامر بسيونى.
والفيلم الخامس "أنا بضيع يا وديع" بطولة "وديع وتهامى" أبطال حملة ميلودى الدعائية، وبتدور أحداثه حول إنتاج تهامى لعدد من الأفلام التجارية الفاشلة اللى بتخلية يخسر كل فلوسة ويدخل فى مشاكل مع الضرائب.
والفيلم السادس والآخير هو "بارتيتا" بطولة كنده علوش، وعمرو يوسف، وتأليف المنتج وائل عبد الله ومن إخراج شريف مندور، وبتدور أحدثه فى إطار كوميدى رومانسى اجتماعى حول بنت بتمر ببعض الاضطرابات النفسية, وبتحاول الخروج من الاضطرابات دي عن طريق أصدقائها اللي بيحاولوا يخرجوها من المشاكل النفسية.