عاجل جدا

يا وزير التربية والتعليم

يا عالم.. يا هوووه
معقول يكون وزير التربية والتعليم د.الهلالي الشربيني فاكر ان»‬شوية» القرارات الأخيرة اللي أعلنها.. هي اللي هتطور التعليم وتحسن مستوي التلامذة.. أو حتي هتخلينا نقف علي أول الطريق ؟!!
معقول يكون فاهم ان تغيير حساب الدرجات هو المشكلة.. أو انه لما يلغي امتحان الميد تيرم ويبدله بامتحان الشهر هو ده اللي »هيعدل المايلة» ؟!!
طب ما احنا كنا كدة الأول؟!! وجاء الوزير اللي قبلك وشاف ان الميد تيرم أفضل.. وهييجي الوزير اللي بعدك يرجع الميد تيرم تاني !!
وفي كل مرة وكلاء الوزارة وخبراء التعليم الملاكي عندهم المبررات النظرية المجعلصة لقرارات وزيرهم.
واحد من كبار المسئولين بالوزارة يقول لك: »‬الهدف من إلغاء امتحانات الميد تيرم لطلاب التعليم الأساسي واستبداله بامتحانات شهر.. هو تواصل التقويم المستمر للطلاب طوال العام الدراسي ووسيلة لقياس المستوي المعرفي والعلمي لهم».. طب ده التلامذة بيشتكوا اساسا من عدم قدرتهم علي التحصيل والفهم وغياب التواصل التام مع الأساتذة.. يبقي هنمتحنهم ونقيّمهم ونقيس مستواهم العلمي والمعرفي علي أي أساس؟!!
أكيد الوزير ووزارته والبلد كلها.. فاهمين وعارفين ومتأكدين..ان المشكلة مش في تخصيص حصص في الجدول للكمبيوتر والرسم أو الألعاب أو الأنشطة الزراعية والصناعية.. لأن كلنا برضه فاهمين وعارفين.. ومتأكدين أن الحصص دي علي الورق فقط.. وان مفيش مكان في المدارس لتدريسها.. ولا فيه أعداد مدرسين كافية.. ولا فيه وقت أصلا.. والدليل علي كدة ان الكمبيوتر في المدارس من سنين طويلة.. لكن مفيش طلاب بيتخرجوا عندهم مهارات الكمبيوتر.. وان المناهج كل سنة بتتعدل وتتغير.. ولسة مفيش تعليم.. وان اللغات بيتم تدريسها من مرحلة الابتدائي.. لكن الطالب بيتخرج من الثانوية العامة ميعرفش انجليزي ولا حتي عربي!!!
والسبب بكل بساطة أن المشاكل الكبيرة.. الخطيرة.. المكلكعة لسه موجودة.. وهي زحمة التلامذة في الفصول.. بسبب نقص المدارس ونقص المدرسين.. ومع الزحمة والكثافة.. مناهج معقدة حتي علي المدرسين نفسهم.. والوزير سايب كل البلاوي دي.. وبيتكلم في الأنشطة.. وتوزيع الدرجات.. وعدد الامتحانات.. واحد والا ثلاثة!! يعني من الآخر احنا بنضحك علي بعض.. وكل هدفنا هو الشو الإعلامي.. علشان يبقي اسمنا عملنا حاجة والسلام.. خاصة اننا داخلين علي موسم تغيير.. وكل سنة وانتم طيبين !!