الحقوني النايل سات وقناه إسرائيلية زرعوا كاميرات في جسدي!

هي ليست نكتة أو دعابة.. وفي نفس الوقت لا نستطيع التأكيد او النفي.. فهي بحق حكاية.. ولا حكايات ألف ليلة وليلة.. لا يصدقها عقل، تلك القصة التي شغلت الرأي العام بأسيوط بطلها انسان طبيعي لا يبدو عليه اي ملامح تشير أنه غير ذلك، ولكن القصة نفسها تستحق التوقف. كانت الامور تسير طبيعية بمكتب أخبار اليوم بمدينة اسيوط ويبدو اليوم طبيعيا كباقي الايام إلا أنه لم يظل كذلك.. فدخل علينا شاب في العقد الثالث من عمره يخبرنا بان لديه مشكلة كبيرة - إلي هنا تبدو الامور عادية.. طلبنا منه الهدوء ودار الحوار التالي.
❊ اسمك ايه ومنين؟
- اسمي عبدالباسط محمد أحمد من قرية ريفا التابعة لمركز اسيوط، عامل بالمعمار.
❊ مشكلتك ايه يا عم عبدالباسط؟
- مشكلتي بدأت من اربع سنين لما صحيت من النوم ولقيت ان النايل سات بالتعاون مع قناة اسرائيلية قد وضعا كاميرات تجسس داخل جسدي وتوجهت مباشرة إلي قسم شرطة اسيوط وابلغتهم بالموقف.
❊ قاطعناه.. ماذا.. وهل ادخال الكاميرات تم من خلال عملية جراحية ام ماذا ؟
- معرفش.. انا صحيت ولقيت الكاميرات تؤلمني داخل جسدي فتوجهت مباشرة الي قسم الشرطة وشرحت لهم الموقف وبعد ان استمعوا ليَّ اخبروني انهم علي علم بذلك وأن القمر الصناعي نايل سات اخبرهم انهم وضعو لي الكاميرات.
الدنيا كلها عارفة!
❊ وانت عرفت ازاي انها كاميرات.. ولما فيه ألم مش المفروض تروح المستشفي الاول؟
- بارتباك.. الكاميرات في جسمي.. حاسس بيها.. ده ألم كاميرات مراقبة.. علشان كده عرفتها.
❊ هوه انت جربت الكاميرات قبل كده ؟!
- لا.. بس أنا عارفها.. وحاسس بيها.. وبعدين انتوا مش مصدقيني ليه.. ده ضباط القسم عارفين الحقيقة ووزير الاعلام نفسه عارف بحكايتي.. ورئيس المباحث قالي هكلملك حد في رئاسة الجمهورية علشان يشيلوهم.
❊ قلت انك كنت نايم في البيت.. طيب دخلولك ازاي؟
- معرفش.. كل الابواب والشبابيك كانت مقفولة.. ونمت وصحيت الصبح لقيت الكاميرات في جسمي.. معرفش ازاي.
❊ طيب وعملت اشعة؟
- ايوه.. عملت اشعة في مستشفي اسيوط العام في نفس السنة، وظهرت فيها كاميرات صغيرة، شوفتها بعيني. وشافها رئيس المباحث، وقالي انا بحاول مش قادر اعملك حاجة، وطول الفترة دي وأنا بروح ليه وبيقولي نفس الكلام.. مش عارف رئيس المباحث ده والقناة الاسرائيلية عايزين مني ايه ؟!
حد يكلمه!
❊ طيب ممكن نشوف الاشعة، او نقابل الدكتور اللي عملها؟
- صمت قليلا.. وقال: لا دي من زمن وضاعت مني، والدكتور انا مش عارفه واكيد ساب المستشفي دلوقتي.. بس انا شوفت الكاميرات بعيني.. ويناشد وزير الاعلام باصدار تعليماته للنايل سات والقناة الاسرائيلية بازالة الكاميرات من جسمي.