عباس في القديم ترباس

عمرو "زرياب" .. ينافس هاني أفندي شاكر

مذيعة: ويسعدني في هذه الحلقة من برنامج "بص قدامك" أن نستضيف الأستاذ "عباس عتيقة" الشهير ب ع.ع.. بعد الرسالة الساخنة التي تلقاها البرنامج من سيادته.. واللي طالب فيها بتغير اسم البرنامج من "بص قدامك" ل "بص وراك"!!!
ع.ع: يا سلام علي زمان.. وأيام زمان.. وشغل زمان ورجالة زمان..
المذيعة: والغفوة بتقول عايزنا نرجع زي زمان.. قول للزمان ارجع يا زمان.. وده مستحيل يا أستاذ عتيقه.
ع.ع: مفيش حاجة اسمها مستحيل...
المذيعة: ازاي بس؟
ع.ع: يعني أنا شخصياً متجوز بنت خالة قطز.
المذيعة: معقولة!
ع.ع: هو الحقيقة اسمه "أبوقطر" وعشا اناسبه.. اشترطت عليه أحط له نقطة علي الره.. عان يبقي "قطز".. من غير أبو.
المذيعة: والعروسة!
ع.ع: يا سلام عليها وهي في اليشمك.. وقاعدة تستناني ورا المشربية.. وعماله تبص علي "المزوله" تستني ميعادي وحواليها أولادي حبايبي "قلاوون".. و"كافور" و"قرناط" وأمهم الست "يلمظ" قاعدة منوره في§ وسطهم.
المذيعة: وأكيد قاعدين يتفرجوا علي التليفزيون.
ع.ع: فشر.. أنا ولادي ماعندهمش غير "الجرامنون".. و"البيانولا".. وساعات أخدهم روض الفرج يشوفوا خيال الضل..
المذيعة: يعني مش مشتركين في أي نادي؟
ع.ع: نادي مين ياماما.. احنا مانخرجش إلا عشان نروح القلعة أنا أصلي شغال هناك.. في السلاحليك.
المذيعة: شغال إيه حضرتك؟
ع.ع: بسن السيوف والمقص!!
المذيعة: معني كده أن حضرتك ملكش أي تعامل مع الحياة الحديثة؟
ع.ع: وهي الحياة اللي انتم عايشينها دي.. اسمها حياة.. يا سلام لما الواحد يصحي الصبح.. ويحدف نفسه في النيل ياخد الدش بتاع الاصطباحه.. ويطلع يركب سوارس يروح بيه الشغل وبعد الضهر يتفرج علي ماتش "حكشه" محترمه..
المذيعة: والأولاد بيروحوا مدرسة ايه؟
ع.ع: أنا عامل لهم كتاب خصوصي وجايب لهم عريف من عتاولة الأزهر وفقهاء اللغة..
المذيعة: والمدام موظفة؟
ع.ع: آه موظفة في الحرملك.. تخرج من أوضه النوم.. تدخل المطبخ تمضي وتستلم الشغل
المذيعة: أهم من كده.. انك ضد التطور يا أستاذ عتيقة؟
ع.ع: بلا تطور بلا مسخرة.. هو فيه أحسن من الطبيعة.. ومع ذلك يا ست هانم.. برضه بنديها شوية تكنولوجيا يعني التلاجة موجوده.. بس جواها القلة القناوي!!
المذيعة: والأغاني.. تحب تسمع ايه؟
ع.ع: هو فيه غيره سي عبده الحامولي.
المذيعة: بس اللي موجود دلوقت سي عمرو دياب.. وهاني شاكر الحامولي.. والست شيرين بنت عبدالوهاب باشا أوغلي.
ع.ع: وعشان تعرفوا اني مش متخلف عن الجديد أنا باحب اسمع المطرب الشاب محمد المملح!!
المذيعة: نعم المملح!!
ع.ع: ايوه.. اللي بيدلعوه ويقولوله يا "حلو"
المذيعة: لكن أنا عرفت يا أستاذ عتيقة أن عندك عربية!
ع.ع: وماله.. ما أنا جايب حصان يسحبها
المذيعة: طيب ممكن توجه رسالة للباشمهندس اللي اخترع الأتاري!!
ع.ع: أأقوله.. خلي بالك سيد أبوطوبة اللي اخترع السيجه بيدور عليك ومستحلف لك..
المذيعة: طيب في ختام اللقاء يا أستاذ عتيقة نحب نلقي الضوء علي المشكلة اللي وقعت بينك وبين شركة التليفونات والاتصالات.
ع.ع: أرجوكي الكلام في الموضوع ده بتجيب المصابي
المذيعة: مش يمكن نلاقي حل يريحيك؟
ع.ع: أنا اللي يريحني حاجة واحدة بس
المذيعة: ايه هي
ع.ع: يغيروا اسم شركة التليفونات
المذيعة: ويعملوها ايه؟
ع.ع: هيئة الحمام الزاجل!!