"كلنا خالد سعيد" تطالب منتقديها بالخروج

وجه المسئولون عن صفحة "كلنا خالد سعيد" على موقع "الفيس بوك" رسالة الى مشتركي الصفحة الذين يروونها صفحة للخونة والعملاء بالانسحاب من الصفحة وعدم العودة لها.
وكتب المسئول عن الصفحة: "يا جماعة النداء التاني: اللي شايف إن الصفحة دي صفحة الخونة والعملاء يا ريت يخرج منها بسرعة .. فيه أكتر من 1,826,620 مشترك في الصفحة .. يا ريت كل اللي شايف إنها صفحة خونة وعملاء يخرج عشان الخونة والعملاء يعرفوا حجمهم الطبيعي. ملاحظة: البوست ده مش مخصص لأي عضو في الصفحة محترم بينتقد أداءها بشكل موضوعي، احنا بنتكلم عن حملة لواء التخوين اللي بيقرروا مين وطني ومين خاين وعميل".
وعلى الجانب الأخر، انتقدت الصفحة الحكم الذي صدر بالحبس لمدة عام لمواطن مصري وزع منشورات تهاجم المجلس العسكري خلال مظاهرات العباسية، وغلقت الصفحة على الحكم بالتالي: "هو ايه نوعية المحاكمات السريعة دي؟ .. ويعني ايه توزيع منشورات ضد المجلس العسكري؟ .. طيب هو اللي بيطلعوا في التلفزيون ويشتموا الثورة جهارا ويشتموا الثوار ويهينوهم ويتهموهم بالعمالة والخيانة دول محدش بييجي جنبهم ليه؟".
وأضافوا: "هو الثورة دي برضه مش هي اللي جابت المجلس العسكري في الحكم وإلا كان زمان مصر دلوقتي بتحتفل برئيسها وقائد مسيرة الشباب جمال مبارك؟ .. طب هل ممكن المحاكم المستعجلة دي اللي بتخلص في أقل من أسبوعين تمسك لنا شوية قضايا مش مهمة زي قضايا تصدير الغاز لإسرائيل بأقل من قيمته .. وقضايا تخصيص الأراضي اللي نهبها الفاسدين في النظام السابق بجنيه للمتر؟ .. وقضايا قتل وتعذيب المصريين؟".