الدبلوماسى يحيى نجم: «بعد الضرب والسحل قالوا لنا: المرشد منع علاجكم»

«إحنا اتبهدلنا وانضربنا وانشتمنا.. والدكتور بتاع الإخوان مرضيش يعالجنى.. وقاللى إن المرشد محذر إن إحنا نعالج أى حد مش إخوان.. وقالوا عليا جاسوس».. بهذه الكلمات بدأ السفير السابق يحيى نجم كلامه أمام محقق نيابة شرق القاهرة وقال فى التحقيقات إن الإخوان قبضوا عليه واعتدوا عليه باللفظ وبالأيدى، وإن ضباط الشرطة «تأخذ الأوامر منهم».
وأضاف نجم أن ما حدث له من سحل وتعذيب هو من قبل الإخوان، و«إن الحرس الجمهورى لم يتدخل فى الإفراج عنّا، وتخليصنا من أيدى الإخوان أمام قصر الاتحادية».
وأكد أن الطبيب الخاص بالإخوان لم يعالجه، وحين سأله عن السبب قال: إن المرشد محذر علينا علاجك، لأنه قال إنه جاسوس ويتخابر مع جهات أجنبية وكلها شائعات ليس لها أساس من الصحة، وأشار فى أقواله فى التحقيقات إلى أن دكتورة من الإخوان تهكمت عليهم بالسب واتهمتهم بالعمالة والخيانة وضربته.
شرح «نجم» تفاصيل الاعتداء فى التحقيقات وهو فى حالة نفسية سيئة: «اتبهدلنا تماماً ومرضيوش يصرفونا وفضلنا مرميين طول الليل، واعتدوا علينا لفظاً وقولاً ومادياً وبيسبّوا، وبيهددوا الشرطة، الضابط اللى واقف بياخد أوامر منهم، بيقوله دخل ده ومتدخلش ده، ولا وجود لأحد من الشرطة نهائى، لحد ما صبح الصبح، والشرطة تستمع إليهم، وهما اللى بيمشوا كل حاجة، وبتاع الجيش جوه القصر مش عايز يطلع، وإذا طلع بيعترض ويدخل تانى، والدكتور بتاع الإخوان مرضيش يعالجنى وقاللى المرشد محذر علينا أعالجك وقال عليا جاسوس وإنى فى الخارجية بتخابر مع جهات أمنية وبيطلعوا كلام فارغ كتير إشاعات، ودكتورة من عندهم بتدينا بالجزمة وتضربنا وتسبنا وتقولنا إحنا مش زيكم، ونقولها إنتى واحدة ست لكنها كانت فى منتهى العدوانية وتضربنى أنا بالذات وتقولى «إنت جاسوس» وعقب الانتهاء من سماع أقواله فى النيابة أمرت النيابة بعرضه على الطب الشرعى لتحديد الإصابات التى لحقت به والأداة المستخدمة.
يشار إلى أن الدبلوماسى السابق يحيى نجم، سفير مصر الأسبق فى فنزويلا، قد تم تعذيبه من قبل مؤيدى مرسى، وسحلوه أمام قصر الاتحادية واتهموه بالبلطجة.
أخبار متعلقة:
بالصور| "الوطن" تنشر مذكرة خاطر اعتراضا على نقله: النائب العام طلب مني أن أسجن متهمي "الاتحادية" لعدم إحراج الرئيس
النائب العام يطيح ب«محامى عام شرق القاهرة» لرفضه حبس متهمى «الاتحادية»
الصيدلى رامى صبرى: سحلونى من الخليفة المأمون وحتى الاتحادية وأوسعونى ضرباً
مينا فيليب: جردونى من ملابسى واعتدوا علىَّ بالعصى والحجارة والأحذية
«بديع» طالب النائب العام بإعادة القبض على المتهمين فى أحداث «الاتحادية»
أعضاء بالنيابة ل"عبد الله": "أنت غير شرعي.. أرحل"