وزير النقل منفعلا: "السكة الحديد بتقول الساعة غلط.. احترموا الناس"

"اعذروني أنا محتد شوية، أنا فعلا زعلان، بغير على بلدي، إيه الإهمال ده"، كلمات غاضبة وجهها المهندس سعد الجيوشي وزير النقل والمواصلات، لمسؤولي السكة الحديد، خلال زيارته المفاجئة، أمس، لمحافظة البحيرة، والتي تفقد فيها محطة قطارات دمنهور ومزلقان "جزيرة البط" والكوبري العلوي برفقته محافظ الإقليم الدكتور محمد سلطان، وقيادات السكة الحديد.
"السكة الحديد بتقول للناس الساعة مش مضبوطة، إما نفكها ونشيلها أو نصلحها، يا جماعة احترموا الناس"، هكذا تابع الوزير حديثه الغاضب إلى مسؤولي المحطة بعد مشاهدته ساعة المحطة المعطلة.
وأضاف: "إيه ده يا جماعة فهموني، إيه سوء النظافة وعدم الصيانة ده فين المقاول، وفين مشرف الصيانة، اللي معملش دوره كما يجب، يتحول للنيابة العامة عشان يتحاسب، والمفروض إنه لو المقاول لسه شغال في المنطقة لازم أحيط المنطقة بشرائط سلامة وأمن، عشان الناس لا تصاب خاصة كبار السن والأطفال، ولأننا سيبنا المقاول يمشي وفيه خلل يبقى فيه إهمال جسيم، ويبقى كمان المهندس المسؤول مش بيشرف، يبقى إحنا مهملين".
وأكد "الجيوشي" أنه سيزور المحطة بعد شهر، لمتابعة أعمال الصيانة بها، والتأكد من إنجازها بالشكل المطلوب، محذرًا من الإهمال.
وأعلن الوزير بدء العمل في تطوير محطة قطارات دمنهور، في غضون أسبوعين، ضمن خطة الوزارة لتطوير محطات القطارات بالمحافظات، مطالبًا برفع كفاءة المزلقانات وأجهزة الاتصالات بها، وتسوية المطبات العشوائية وإزالة التراكمات والمخلفات حولها.
وشدد "الجيوشي" على إجراء أعمال الصيانة الدورية للمحطة والأرصفة ودورات المياه وأماكن انتظار الركاب، ورفع كفاءة وتكثيف أعمال النظافة ورفع التراكمات والتشوينات من داخل المحطة، مطالبا الشركة المنفذة لأعمال كوبري دمنهور العلوي، بتكثيف الأعمال للانتهاء من الكوبرى في الموعد المحدد 30 مارس 2016، نظرا لما يمثله من أهمية مرورية على الطريق الزراعي السريع.