السيسي عن «حياة كريمة»: «هل ده مش حق من حقوق الإنسان؟!»

وجه الرئيس عبدالفتاح السيسي، رسالة إلى أهالي القرى التي تشهد أعمال التطوير ضمن المبادرة الرئاسية حياة كريمة، قائلا: «أتمنى إنكم تساعدونا وإننا بنعمل شغل في القرية استحملونا وكل ما تساعدونا هنقدر نخلص المشروع بسرعة، وفكرة إن البيت ميبقاش دور ويبقى دورين وتلاتة ده أمر مهم أوي.. عندنا 150 ألف بيت في المرحلة الأولى، يعني بنتكلم في نصف مليون بيت، وبقول إن أصحابهم محتاجين إننا نعملهم الحكاية دي، ماشي هنعمل، طب أهل القرية ميساعدوش معانا؟! منظمات المجتمع المدني ميساعدوش معانا؟! طب كل من عاوز يساعد في حياة كريمة ميساعدش معانا؟! انتو كنتو بتشوفوا بيت معملو جدار أبيض وعليه فروع شجر، أنا مش هعمله كده».
وأضاف رئيس الجمهورية خلال تفقده المعدات والمركبات والآلات الهندسية لجهات الدولة المختلفة المشاركة في مبادرة «حياة كريمة» لتطوير قرى الريف المصري: «أنا هعمله إن شاء الله بما يليق بالناس وفيه كل حاجة كويسة، بس ده تكاليف كتير، أنا بتكلم فقط على 150 ألف بيت عاوزين يتبنوا ويتعملوا بيت يتسكن فيه وفيه 3 غرف ومطبخ والأمور التانية، ودي فلوس كتير، وده ملهوش علاقة بالصرف الصحي اللي بيتوصل وتوصيل المياه والكهرباء ورصف الطرق وتبطين الترع».
وواصل: «هيبقى لنا لقاء آخر في إعلان الوثيقة وإطلاق العمل خلال الأيام القليلة الماضية وبقول تاني، هل اللي أنا بعمله ده مش حق من حقوق الإنسان؟! قولنا للإعلام يصوروا الناس في القرى عشان تتكلم أديكم بتسمعوا بيقولوا إيه؟! هو مش من حقوق الإنسان إنه يعيش بشكل كريم؟! عندنا أكتر من 40 ألف جمعية بمنظمات المجتمع المدني، ممكن يشتغلوا معانا بس في آلية لأن المشروع تفاصيله كتير، جهة واحدة هتصرف على المشروع كله عشان نبقى عارفين تفاصيل وأبعاد الموضوع بشكل كويس، والوعاء اللي بنتكلم فيه هو مالية الدولة صندوق تحيا مصر، وعشان الأمور تبقى محكومة كويسة يكون الكلام ده من خلال صندوق تحيا مصر».