كواليس إصابة الفنان شريف دسوقي: مش بسبب فيلم «وقفة رجالة»

ترددت الكثير من الأخبار بشأن إصابة الفنان شريف دسوقي، حيث أرجعها البعض إلى أنها حدثت أثناء تصويره فيلم «وقفة رجالة» عقب تصوير أحد المشاهد الخطيرة التي حُذفت من العمل، إلا أن ما لا يعلمه البعض، أن كواليس الإصابة كانت في مسلسل بحسب ما كشفه الفنان سابقا من خلال منشور له على صفحته بموقع «فيسبوك»، وأيضًا في برنامح الحكاية الذي يقدمه الإعلامي عمرو أديب.
حقيقة إصابة الفنان شريف دسوقي
وسبق وتحدث الفنان شريف دسوقي من خلال منشور له عبر صفحته بموقع التواصل الاجتماعي «فيسبوك» في شهر مارس الماضي، عن إصابته في أحد المسلسلات وليس فيلم كما تردد: «اللي حصل إني أُصبت في رجلي أثناء تصوير أحد المسلسلات اللي مشوني منها، ويشهد على كده كل اللي بيتعاملوا معايا، اتصابت يومها بجرح صغير ومكنتش أعرف إني عندي سكر، المهم روحت وجيت تاني يوم، حسيت بدوخة قولتلهم ودوني المستشفى لأفاجئ إن ولا واحد من المسلسل معايا باستثناء المنتج أحمد الجنايني وهو منتج فيلمي وقفة رجالة».
واستكمل شريف دسوقي حديثه: «عملت تحاليل واكتشفت إني عندي سكر، وخبيت على الأستاذ أحمد الجنايني إني مصاب عشان معطلش التصوير بتاع فيلم وقفة رجالة، الحمد لله نتاج تحملي ربنا كرمنا، خلصت الفيلم وداخل حاجات تانية، وفوجئت إن الدنيا كلها بتقول مشّوا شريف من المسلسلات عشان بيخش مخمور وسكران، أنا المتربي على مدرسة إسماعيل ياسين، أنا مدرّب مادة التمثيل مستحيل أبقى نصاب، بطالب بحقي فقط لا غير إني أتعوض عن اللي حصل، أنا مخدتش تلت أجري ومش عيب أٌقول كدا».
شريف دسوقي: الظلم وحش
وتحدث الفنان أيضًا عن موضوع المصحة النفسية: «هي زيارة نفسية اللي روحتها وكانت من 20 سنة لما انفصلت عن زوجتي أم ابني، هو فيه حد لما ينفصل عن زوجته ينزل الشارع يرقص؟، أنا 40 سنة ببني نفسي بدراعي واشتغلت مع أكبر مخرجين مصر اسألهم شريف عامل إيه في اللوكيشن، ليه الموهوب واللي بينوّر في زماننا بيحاربوه؟ .. ليه احنا البلد اللي بتقتل الموهوبين الحقيقيين؟ .. أنا زعلت عشان حالتي كانت صعبة من 8 شهور استشاريين كانوا يعيطوا وميقدروش يبصوا لرجلي النهاردة».
واضاف «الحمدلله، ربنا عافاني بعد فترة مقولتش لحد فيها حاجة، بس من حقي أزعل لما أتكشف إعلاميًا غصب عني، أنا مكنش عندي صداع أنا كنت مهدد فعلًا ببتر رجلي! عيب يتقال عليا إني روحت مصحة نفسية أو بدخل اللوكيشن سكران أنا بحضر قبل التصوير بساعتين وبقعد مع العمال نظبط الديكورات ونفطر مع بعض.. الظلم وحش».
وفي لقائه مع الإعلامي عمرو أديب، تحدث شريف دسوقي أيضا عن الأزمة التي عاشها مؤخرًا، حيث أصيب خلال كواليس عمله في أحد المسلسلات ب«خربوش صغير»، وكانت صحته جيدة ولا يعاني من أي أمراض، كما أن عمره 53 عامًا ويسبح في البحر بالإسكنرية أثناء شهر طوبة.
واستكمل حديثه، قائلًا إنه فوجئ خلال 11 يومًا بإصابته بعدد من الأمراض «سكر وضغط وحمى وقدم سكري، وأنا في التصوير بمسلسل اللي قالوا أنهم مشوني منه عشان اتصابت بخربوش صغير ومعرفش أن كان عندي سكر، وتاني يوم في التصوير جالي دوخة ولاقيت نفسي بقع فقولت ليهم ودوني المستشفى واتفاجئت أن مفيش أي حد من فريق المسلسل غير الأستاذ أحمد الجنايني».
وجدير بالذكر أن ساق الفنان شريف الدسوقي بُترت بسبب القدم السكري، بعد تدهور حالتها واضطر الأطباء لعمل ذلك.