محصل كهرباء: «أنا اللى فى وش المدفع الناس بتقفل الباب فى وشى.. أنا مالى!»

هم ثقيل يحمله إيهاب نادى، محصل كهرباء، على عاتقه أول كل شهر عندما يتسلم فواتير الكهرباء الخاصة بعزبة جبريل فى فيصل لتحصيلها، فحالة الغضب التى تنتاب المواطنين من الانقطاع المتكرر للتيار الكهربائى تتحول إلى مشاجرات ومشاحنات بمجرد رؤية «محصل كهرباء»، لكنه بابتسامته وبتقديره لغضب الناس يستطيع أن يمتص غضبهم.
■ كيف تتعامل مع غضب المواطنين؟
- بحاول أضحك فى وشهم، أقولهم معلش دى أزمة وهتعدى، وبحاول تكون علاقتى كويسة مع المشترك، لإنى بشوفه كل شهر.
■ ماذا تفعل لو ذهبت لتحصيل فواتير ووجدت التيار الكهربائى منقطع؟
- مقدرش أطلع، بقف تحت العمارة لحد ما النور ييجى وبعدين أطلع، عشان مستفزش الناس.
■ هل تلتمس العذر لمواطنين يدفعون فاتورة خدمة لا يحصلون عليها؟
- الناس بصراحة معذورة، وعندها حق فى كل حاجة، لكن المشكلة إن شاء الله هتتحل.
■ ما رد فعل المواطن عندما تطالبه بسداد الفاتورة؟
- مش كل الناس زى بعض، بس الجملة اللى حفظتها من كل الناس: «الكهرباء بتقطع خمس مرات فى اليوم»، وفيه ناس كتير بتقوللى: «النور بيقطع جايين تاخدوه فلوس ليه؟»، وساعات واحد يقولى: «إنت عايز فاتورة الكهرباء طب مش لما تيجى الكهرباء الأول»، وفيه ناس بتقولى مش هدفع وفيه اللى بيقفل الباب فى وشى، وفيه ناس خلقها ضيق ممكن تزعق وتتخانق وتمسك فيا.
■ فى حال رفض المواطن سداد الفاتورة.. ماذا تفعل؟
- بنمشى فى إجراءات رسمية، نعمل إخطاراً بقطع التيار 48 ساعة، والمواطن لما بيستلم الإنذار بيخاف ويروح يدفع ولو المبلغ كبير بنقسط على 3 أو 4 مرات.
■ كيف تتعامل مع الشكاوى الأخرى الخاصة بارتفاع قيمة الفاتورة مقارنة بمعدل الاستهلاك؟
- أول حاجة ببص على العداد، لو قراءة العداد أكبر، أقوله إنت عليك فلوس الشهر اللى جاى، ولو قيمة الفاتورة أكبر من قراءة العداد أقوله لا إنت متدفعش، زى ما أنا باخد منك حق الشركة أديك حقك.
■ هل تبلغ شركة الكهرباء بما تتعرض له يومياً؟
- ببلغها طبعاً بس الشركة بتسأل عن «المحصلات»، ولو محصلتش الفواتير ممكن أتعرض لجزا، لكن للأسف الناس متعرفش كده.