وزير النقل لأهالي عقارات الدائري: مش هتخرجوا غير لما تستلموا التعويض

وعد المهندس كامل الوزير، وزير النقل والمواصلات، المواطنين القاطنين بالعقارات المجاورة مباشرة للطريق الدائري والتي سيتم هدمها من أجل تطوير وتوسيع الطريق بأخذ تعويضاتهم وحقوقهم كاملة قبل الخروج من الوحدة السكنية، «مش هنطلعكم إلا لما تصرفوا التعويض بتاعكم وتحطوه في حسابكم كمان أو تصرفوه من البريد».
وأضاف «الوزير»، خلال مداخلة هاتفية في برنامج «الحكاية»، الذي يُعرض على شاشة «MBC مصر»، مع الإعلامي عمرو أديب، «طبعا أهالينا من حقهم يسألوا ويفهموا، أنا كل يوم اثنين بعمل مؤتمر عندي في الوزارة مع كل الممثلين عن الوزارات المعنية وبشكرهم جدًا وهم وزارات البترول والكهرباء والإسكان والاتصالات».
وأشار وزير النقل والمواصلات، إلى أن هذا يُعد مشروع دولة، وليس مشروع وزارة النقل والمواصلات فقط، كما أن كل أجهزة الدولة تتعاون، وكذلك محافظات القاهرة والجيزة والقليوبية، «بننزل على المواقع ونحل مشاكل المواطنين، واحد قالي طب أرض الدولة اللي أنا بنيت عليها هتعوضني ازاي، قولتله مصر مش هتعوض حد على قيمة أرض العقار اللي بنى عليها».
وأوضح أن البعض يتساءل عن موعد الحصول على التعويضات، وكان رده عليه «مش هنطلعك من الشقة غير لما الفلوس تتحولك وتحطها في البنك أو تستلمها من البريد، الناس النهاردة اشتكت من المخلفات والزبالة اللي مرمية في منطقة المرج والخصوص، وما أدراك ما المرج والخصوص، كلمت المحافظ وأيضًا رؤساء المحليات وعلى الفور شالوا هذه القمامة».
وتابع: «واحد قالي هما مشالوش القمامة إلا عشان أنت موجود النهاردة، قولتله أنا خلاص موجود معاكم كل يوم اثنين، واديتهم رقمي وقولتلهم لو لاقيتوا حد مشتغلش بلغوني شخصيًا، وبعدين كلمتهم قولتلهم مين رمي المخلفات دي، قالولي يعني نرمي فين، شاورتلهم على صندوق قمامة وقولتلهم ابقوا حطوا فيه».