مريهان الثانية مكرر أدبى: لا بد أن تهتم الحكومة بالتعليم والمدارس

سأدخل حقوق حتى أدرس القوانين وأكون مثل أبى

قالت الطالبة مريهان فيصل عبد الحميد حرحش، بمدرسة البحر المتوسط والحاصلة على المركز الثاني مكرر شعبة أدبي على مستوي الجمهورية، ل"الوطن": "أنا كنت حاسة أنى حكون من الأوائل بس ما كنتش عايزه أحط أمل كبير علشان لو ما طلعتش ما زعلش وأفضل حزينة، بس الحمد لله ربنا ما ضيعش تعبى، أنا على طول كنت بطلع الأولي على المدرسة ".
وأضافت: "أول ما ماما سمعت الخبر فضلت بكت وقالت الحمد لله تعبك ما رحش هدر، كلنا فرحانين في البيت ومش قادرين نستوعب، أنا مصدقتش غير لما شفت بعيني صورتي نازله علي النت وانا الثانية مكرر، وكمان مكتب الوزير كلم أخويا في البيت على التليفون الأرضي وبلغه علشان أحنا مكناش في البيت".
وتابعت حديثها قائله: "أنا في مدرسة حكومي والحمد لله كنت من أوائل الثانوية العامة، علشان الناس تتأكد أن مش كل الأوائل يكونوا من المدارس الخاصة، بالعكس المدارس الحكومية في طلاب شاطرين".
وأشارت "مريهان" إلى أنها ستلتحق بكلية الحقوق إنجليزي جامعة الإسكندرية، وذلك لتكون مثل والدها الذي يعتبر المثل الأعلى لها، قائله: "أنا حدخل حقوق إنجليزي علشان انا بحب القوانين والعدل ونفسي أحقق حاجة في المجال ده وأكون زي والدي لأنه قاضي، أنا نفسي أدرس القوانين واتعين معيده في الكلية وأعمل الطلاب الحق والعدل".
واستطردت حديثها قائلة: "أنا عايزه أوجه رسالة للبلد، لازم التعليم يتقدم ويكون في اهتمام أكبر بالعميلة التعليمية وبالمدارس الحكومية لأنها بتخرج طلاب متوفقين وأوائل وكمان بيكونوا في عباقرة، ولازم كمان يكون في اعتماد علي المدرسة لأن في طلاب شاطرين بسبب مش بيكونوا من الأوائل علشان مش قادرين يأخذوا دروس في كل المواد".
وقالت: رسالة لطلاب الثانوية العامة لا تخافوا من المذاكرة وخلي عندكم هدف، علشان تحققوا حلمكم".