رفع أسعار الوقود "يشعل" غضب السائقين: هنغلي الأجرة.. وبنحب السيسي والحكومة بتتعبنا

يخرجون من بيوتهم، معتمدين على الله في تحقيق آمال بسيطة، ولا يطمعون، في نهاية كل يوم، إلا في بضعة أموال تكفي للقمة هنية لأولادهم أو قطعة حلوى لأطفالهم تسعد نفوسهم.. هم السائقون الذين يرتبط عملهم ارتباطًا وثيقًا بقرار رئيس الوزراء، أمس، برفع أسعار المواد البترولية، في أزمة جديدة تضاف إلى قائمة أعبائهم.
ياسر كمال، أحد سائقي سيارات البيجوه الخاصة، يؤكد أن رفع أسعار الوقود سيعود بالضرر عليه، فعمله يحتاج للتنقل بين المحافظات المختلفة، وهذا بدوره يتطلب كمًا كبيرًا من البنزين، "أنا دلوقتي لو رايح مشوار من المنوفية لمحافظة تانية، بافوِّل العربية ب60 لتر، والبنزين 80 غلي 70 قرش، يعني معنى ده إني بدل ما كنت بافوِّل مثلا ب60 جنيه، الموضوع هايوصل ل100، ده غير قطع غيار العربية وتغيير الزيت وأجرة تانية لو فيه سواق شغال عليها".
زيادة أسعار السلع سيجبر ياسر على تحميل "زبونه" فوق طاقته، "لو الأسعار فضلت زي ما هي هابقا حنين على الراجل، لكن لو لقيت زيادات كبيرة أكيد الموضوع مش هاييجي عليا لوحدي ولازم المشوار اللي كنت بعمله ب200 يوصل ل300، وأنا كده هبقا زودت 50% وسعر البنزين زاد عليّا 70%".
المشكلة الأكبر من رفع أسعار الوقود ستصيب سائقي سيارات "موقف عبود"، التي تنقل المواطنين من القاهرة إلى الأقاليم، حيث يتوقَّع ياسر أن هؤلاء السائقين سينظمون إضرابًا، "العربيات ده السواقين شاريينها ب250 ألف جنيه أقل حاجة، وبيطلعوا كل يوم ب280 جنيه، بيدفعوا 180 جنيه كارتة وجاز وتغيير زيت، هايفضل صافي 100 جنيه في اليوم، وهما بيدفعوا قسط العربية 2500 جنيه في الشهر، يعني العربية مش هاتجيب غير 500 جنيه بس".
ياسر لفت إلى مشكلة أخرى ستزيد الأمور تعقيدًا، رصد عدم توفر البنزين في جميع محطات مركز الشهداء بالمنوفية، "المحطات كلها شطبت من الساعة 11، ومش مكفيهم إنهم بيحتكروا البنزين زي التجار القدام، لكن كمان ما بيوفروهوش".
"وقفوا حالنا أكتر ماهو موقوف"، بهذه الكلمات اعترض الحاج إبراهيم موسى، سائق سيارة نصف نقل، بشدة على القرار، وأكد أن رفع الأسعار سيتسبب في رفعهم للأجرة على المواطن، وهو ما سيقابله "الزبون" بالرفض بحجة أن الدولة قررت عدم زيادة التعريفة طبقًا لرفع أسعار الوقود.
موسى أكد أن الجميع كان سيتقبَّل الزيادة في حال منطقيتها، بحسب قوله، "أنا بجيب صفيحة السولار ب22 جنيه، فوجئت إنها زادت دلوقتي 14 جنيه ومش عارف هنجيب منين، لو عايزيننا نساعدهم يزودوها 3 أو 5 جنيه، بس ما يقطموش وسطنا كده".
الحاج إبراهيم لديه 3 أبناء حاصلين على مؤهلات متوسطة، "ومش لاقيين شغل وبيجري عليهم"، ويرى أن ما فعلته الحكومة يعطي للإخوان والسلفيين فرصة كبيرة في الشماتة في كل من انتخب السيسي، بحسب قوله، "من ساعة ما ده حصل وهما قاعدين يقولو لنا اشربوا وإتحملوا اللي عملتوه، وإحنا ما بنديهومش فرصة وبنقولهم عاجبنا، لكن الحقيقة إننا بنحب السيسي واللي ماسكين البلد وهما بيتعبونا".