السيسى و«الهارد كور»

«لا وجود للإخوان ولا للنظام السابق».. ده اللى قاله المشير السيسى فى لقائه.
طبعا حوار المشير ماعجبش ناس كتير وعلى رأسهم «الهارد كور».. واسمحوا لى أشرح لكم أنواع «الهارد كور».
عندنا «الهارد كور» ثورة، ودول بقى عندهم حالة ثورية لا إرادية ثايرين 24 ساعة فى ال24 ساعة.. ثايرين دايماً ضد كل حاجة وأى حاجة وأى حد مايسمعش كلامهم أو يعارضهم.. وشايفين إن الجيش انقلب على الثورة وبيحاول يستولى على الحكم.
أما «الهارد كور» فلول، فدول بقى مباركيين أكتر من مبارك شخصيا.. دول عايشين فى حدود ما قبل 25 يناير، وشايفين أن الحل هو رجوع مبارك.. وأنهم هما الصح والكل غلط.. وفى أى مناسبة لازم يقولوا لك إن ده عمله مبارك وده ماكنش هيحصل أيام مبارك، وإن البلد مش هتنصلح إلا لو مبارك رجع يحكم، وإن الجيش خاين وغدر بمبارك.
وهنضم عليهم بعض أنصار شفيق اللى فجأة تحولوا، وكأنهم كانوا فاكرين أن بعد ثورة 30 يونيو الجيش هيشيل مرسى يحط شفيق.. ومش فاهمة جالهم الاعتقاد ده على أى أساس!! أنا واحدة انتخبت شفيق مرتين، لكن عمر ما كان هدفى من نزول يوم 30 يونيو ان شفيق يحكم، وأعتقد أن كل «الدولجية» اللى زيى كان هدفهم اننا ننقذ مصر من الاحتلال الإخوانى الإرهابى.
نرجع تانى لموضوعنا.. من قبل 30 يونيو و«الهارد كور» مع الإخوان كانوا ضد حشدنا والاتنين رفضوا النزول معانا.. واللى نزل منهم ما قدرش يمسك نفسه ورجع تانى زى ما كان.
أول ناس ابتدت تشق صفنا بعد 30 يونيو.. أول ناس وقفت ضد خارطة الطريق.. أول ناس كانت ضد دستور 2013 هما «الهارد كور» ثورة وفلول.
والحقيقة إنه ابتدا يبقى فيه خط فاصل بين «الدولجية» و««الهارد كور»؛ نتيجة اختلاف التوجهات، فأنصار الدولة المصرية بالتأكيد مش هيكونوا محط إعجاب من أنصار الأشخاص.
مشكلة السيسى الفترة اللى جاية هما «الهارد كور».. كل واحد فيهم ضد مشروع الدولة المصرية.. كل واحد فيهم شايف أن البلد مش هتقوم غير بالأشخاص اللى بيدعمهم.. كل واحد فيهم هيهاجم السيسى وقراراته لو نجح.. هما الأعداء بس من غير سلاح.. هيمارسوا أقوى درجات الإرهاب الفكرى والنفسى.. هيروجوا حالة من الإحباط بين الشعب.
«الهارد كور» مش هيبنوا معانا، لا هيبقوا قاعدين لينا ع الواحدة.. بالبلدى هيفضلوا يقطّموا فينا على أى حاجة.. وكأن مبارك أو البرادعى كان عندهم عصايا سحرية.
ده غير أن فى فئة من «الهارد كور» بتهاجم نتيجة إنها ما عرفتش تاخد حتة من التورتة.. الحقيقة أن اللى مش قادرين يفهموه أن تورتة مصر بقت بتاعة كل المصريين ومش هيسمحوا لحد أنه ياخدها منهم.
رغم أن السيسى لو فاز هيبقى عنده معركة مع «الهارد كور» شرسة وعنيفة.. لكن هو عارف كويس جدا أن أنصار الدولة هيساندوه وهيقفوا جنب بلدهم.
نصيحة لكل «الهارد كور».. جنبوا تأييدكم للأشخاص وفكروا فى مصر.. فكروا فى بكره.. فكروا فى ولادكم وأحفادكم.. مش هنطلب منكم تاخدوا صف السيسى لو فاز لكن اتعلموا تكونوا معارضة فعالة بناءة.. بلاش تبقوا أدوات هدم لأننا مش هنسمح لكم ولا هنسامحكم.