"مصر مش هتخرب ونازلين الجمعة".. فنانون يعلنون تأييدهم للسيسي والجيش

أذاعت قناة "extra news" فيديو لنجوم الفن في مصر، أعلنوا فيه دعمهم وتأييدهم للرئيس عبدالفتاح السيسي والقوات المسلحة، وناشدوا المواطنين بالنزول بميدان الشهيد هشام بركات والمنصة بمصر الجديدة للتأكيد على دعمهم للدولة المصرية.
قال الفنان محمد فؤاد، في الفيديو، "يوم الجمعة الجاية استنوني عند المنصة، هننزل نأيد الجيش المصري والشرطة المصرية والرئيس عبد الفتاح السيسي، وهغني ألبومي الجديد، مصر مش هتخرب تاني، مصر مش هتخرب تاني"، فيما وجه الفنان محمد نور رسالته للجمهور: "مستنيكم يوم الجمعة عشان ننزل نحتفل بالجيش المصري والرئيس عبد الفتاح السيسي .. تحيا مصر".
من ناحية أخرى، قالت الفنانة التونسية لطيفة، إنها تعيش في مصر منذ أكثر من 25 عامًا ودّرست وتعلمت وتخرجت من مصر، وحققت نجاحات كبيرة داخل الدولة المصرية، مضيفة :" اللي مش شايف الانجازات اللي حصلت في مصر يبقى مش شايف حاجات كتير أوي ، مش شايف قناة السويس الجديدة، والعاصمة الإدارية الجديدة، ومدينة العلمين الجديدة، والطرق والكباري، فيه مجهودات حصلت للقضاء على فيروس سي، أنا بدعم مصر ومن يرأسها والجيش المصري والشعب المصري والشرطة المصرية، ربنا يحمي مصر ويسقط الخونة".
وقال الفنان أحمد صيام، "أنا مواطن مصري عادي، لا أنتمي لأي حزب، أنا لا انتمي سوى لمصر فقط، لو اللي بره مصر جنة أنا هفضل عايش جوه مصر، بحب جيش مصر وشرطتها وقضائها ورئيسها، وبعتبر نفسي جندي من جنود مصر، هننزل إن شاء الله في ميدان الشهيد هشام بركات يوم الجمعة نقول إن مصر مترابطة ومحدش يقدر يهزها، يارب يفضل اهلها في رباط ليوم الدين".
بينما قال الفنان صبري فواز: "عيشنا تجارب كتير وشوفنا كتير الفترة الاخيرة، مش باقي إلا مصر والرهان على مصر، وإننا ينفع نختلف ونتفق زي ما نحب، بس تفضل المحروسة محروسة، باين حوالينا إن مفيش دولة فرطت وعرفت تلم نفسها تاني، الوضع في الدول اللي حوالينا مرعبة، امسك في نفسك، لازم نحل مشاكلنا مع بعض، ونتخانق مع بعض ونتخاصم بعض ونصالح بعض ونحب بعض بس وإحنا جوه بلدنا، احفظوا مصر، لازم مصر تفضل محروسة مهما كان اللي هيحصل".
فيما قال المنشد محمود ياسين التهامي: "أنا حاليا في الامارات العربية الشقيقة وبالتحديد في مدينة ابو ظبي، أنا عشان اجي هنا ابو ظبي وعشان اروح تونس واسبانيا ولندن وفرنسا الحمد لله بفضل الله وحضرة النبي، ده كله بفضل الجيش المصري العظيم والشرطة المصرية عشان سايب ولادي في حمى ربنا وحضرة النبي وجيش مصر والشرطة المصرية عشان كده بطمن ومفيش عندي أي مشكلة، ليه الناس عاوزه تحرم البلد من نعمة الأمان".
بينما بدأ المغني الشعبي طارق الشيخ، حديثه بدعم الدولة المصرية، حيث قال "بسم الله الرحمن الرحيم لكل واحد بيجب مصر واستقرار مصر، إن شاء الله يوم الجمعة بعد العصر الساعة 4 نتجمع في ميدان الشهيد هشام بركات، نعبر عن رأينا نحب مصر، نبعد أي شبهة من الإخوان المسلمين، تحيا مصر".
فيما قال المغني الشعبي ريكو: "كلنا نتقابل الجمعة الجاية في المنصة، عشان نقول إحنا مع رئيس مصر وتحيا مصر وجيش مصر ".