سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
نص شهادة سكرتير النائب العام المساعد: «ياسين» حصل على جهاز «DVR» لنفسه قبل مغادرة المكتب أسامة عبدالله: أجهزة التسجيل كانت موجودة أسفل «الترابيزة» أمام مكتب النائب العام المساعد
تنشر «الوطن» شهادة أسامة عبدالله، سكرتير النائب العام المساعد، فى قضية التنصت على مكتب النائب العام، حيث أكد أن المستشار حسن ياسين، النائب المساعد للمستشار طلعت عبدالله، حصل على أحد أجهزة التسجيل لنفسه بداعى تسديد ثمنها.. وجاء نص شهادته كالآتى: س: هل كنت موجوداً أثناء تركيب أجهزة المراقبة بمكتب النائب العام المساعد المستشار حسن ياسين؟ ج: أيوه كنت موجود، ولكن ماكنتش باقف مع العمال أثناء التركيب. س: وما معلوماتك عن واقعة تركيب الأجهزة؟ ج: أنا ماعنديش معلومات عن كيفية التركيب، واللى أعرفه من خلال كلام الحجاب والسعاة فى المكتب إنه هيتمّ تركيب كاميرات فى المكتب بتاعنا، لكن ماعرفش تفاصيل أكتر من كده، وكانوا بيشتغلوا بعد انصراف جميع العاملين وبعد تركيب الأجهزة، وأنا شفت شاشة جوّه المكتب بتعرض أربع مناظر فى الطرقة اللى قدام المكتب وواحدة للشارع، وأنا شفت إن فيه حاجتين شكلهم غريب فى سقف المكتب، سألت الحجاب عن طبيعة الحاجات دى قالوا لى مانعرفش، وسألت إن كان فى حاجة جوه المكتب، قالوا برضه مانعرفش، وقالوا لى لما تحب تشغل الشاشة عن طريق ريموت كنترول بالضغط على زرار واحد فقط، ودا اللى أعرفه. س: متى تم تركيب هذه الكاميرات؟ ج: للأسف أنا غير متذكر التاريخ تحديداً. س: من أمر بتركيب هذه الأجهزة، وكيف تم الاتفاق على تركيبها؟ ج: ماعرفش. س: ما اسم الشركة التى قامت بعملية التركيب؟ ج: ماعرفش. س: من الذى كان يشرف على عملية التركيب؟ ج: سعاة المكتب والحجاب هما اللى كانوا بيوجدوا مع العمال أثناء التركيب، وكان بتعليمات من معالى النائب العام وماعرفش مين تحديداً اللى كان بيدّى التعليمات. س: وكيف كان يتم تركيب الأجهزة؟ ج: بعد انصراف العاملين من المحكمة، أى بعد مواعيد العمل الرسمية. س: ما الأجهزة التى تم تركيبها؟ ج: أنا ماعرفش إيه اللى اتركّب فى مكتب النائب العام، ولكن أنا شفت فى مكتب سكرتارية النائب العام أربع مناظر؛ الطرقة والمكتب والشارع من الخارج، وكان فيه جهاز بيقولوا عليه «dvr» وفيه حاجتين فى سقف حجرة السكرتارية وفى مكتب النائب العام المساعد أيضاً، كان فيه شاشة بتعرض أربع مناظر للطرقة والشارع، وكان فيه حاجتين مدورين فى السقف وجهاز «dvr» تانى، وكان فيه 3 كاميرات فى الطرقة وكاميرا فى الشارع. س: هل كانت الأجهزة التى تم تركيبها بمكتب النائب العام المساعد متصلة بشاشة العرض؟ ج: ماعرفش، لكن أنا اللى أعرفه إن فيه شاشتين بتعرض ما يدور فى الطرقة أو الشارع، واحدة فى مكتب النائب العام والتانية فى مكتب سكرتارية النائب العام، وماعرفش الشاشة اللى فى مكتب النائب العام بتعرض نفس المناظر ولا لأ. س: من الذى كان يقوم بتشغيل جهاز «dvr» بمكتب النائب العام المساعد؟ ج: ماعرفش، لأن ماحدش طلب إن احنا نشغله، لكن الشاشة هى اللى كنا بنشغلها بالريموت كنترول كل يوم، لكن «dvr» ماكانش فيه اهتمام إننا نشغلها. س: أين كان يوجد جهاز «dvr» بمكتب النائب العام المساعد؟ ج: بجوار مكتب النائب العام المساعد على يسار المكتب توجد «ترابيزة» عليها تليفونات، وكان الجهاز موضوعاً بالجزء السفلى منها. س: وهل كنت تعرف كيفية تشغيل الجهاز؟ ج: لا. س: تلاحظ لنا أن ما تم توريده عدد 4 أجهزة «dvr» بمكتب النائب العام والسكرتارية، ويوجد جهاز ثالث بمكتب السكرتارية يعمل حالياً على الكاميرات الخارجية فأين جهاز «dvr» الرابع والذى كان بمكتب النائب العام المساعد حسن ياسين؟ ج: الجهاز اللى كان موجود فى المكتب بتاع النائب العام المساعد أخده المستشار حسن ياسين. س: كيف علمت بذلك؟ ج: أنا دخلت المكتب زى ما بادخل عادى عشان الشغل وشفته بيفكه وأخده معاه. س: وكيف تأكدت أن المستشار حسن ياسين أخذ الجهاز؟ ج: أنا شفته وهو بيفك الجهاز وحطه فى الشنطة بتاعته وقال لى أنا هاخد الجهاز وهادفع تمنه، أو أنا دفعت تمنه، مش فاكر العبارة بالتحديد.
