ريم العدل لسامح عبدالعزيز: 95% من شغل "زي الشمس" عملته كاملة أبو ذكرى

خرجت الاستايلست ريم العدل عن صمتها بعدما كتب المخرج سامح عبدالعزيز منشورًا عبر صفحته الشخصية فيما يتعلق بأزمة مسلسل "زي الشمس"، المشارك في سباق الدراما الرمضانية، خاصة بعد ما تجاهلت الشركة المنتجة كتابة اسم المخرجة كاملة أبو ذكرى على تتر المسلسل مقابل وضع اسمه، لأنه استكمل تصوير المسلسل بعد انسحابها.
وكتبت "ريم" عبر حسابها الشخصي "فيس بوك": "أنا كان نفسي مفتحش الموضوع ده خالص، وكنت والله فرحانة لأصحابي الممثلين اللي الناس طايرة بيهم وبأدائهم وبشكلهم ولبسهم حتى لو الكريدت راح لحد تاني، بس بيني وبين نفسي أنا عارفة أن ده شغلنا اللي تعبنا فيه، وقولت هسكت خالص مش هتكلم".
وأضافت "ريم": "بس صحيت النهاردة على بوست من الأستاذ سامح عبدالعزيز عدى كل التوقعات! يا أستاذ سامح الزمالة ليها احترمها ولو حضرتك كنت كلمت الأستاذة كاملة قبل ما تدخل مكانها مكنش حد زعل، ولما الناس سقفت على الحلقات اللي هي عاملة 95٪؜ منها؛ كنت حضرتك رديت قولت ده شغل كاملة لحد دلوقتي والشكر ليها كنّا سقفنا لحضرتك واحترمنا أدبك واحترامك لزمايلك وشغل زمايلك وكنت أتمنى لك من كل قلبنا تكمل الحلقات بنفس المستوى والله".
وتابعت "ريم": "طبيعي أن دمها يتحرق لما شغلها يتسقف لحد تاني عليه، لكن مش طبيعي إن حضرتك تكتب بوست زي ده على زميلة.. أنا عندي ذهول من الطريقة حقيقي! أستاذ خالد عزام قبل ما يروح مكاني في المسلسل كلمني، وقال لي لو مش عايزاني أروح مش هروح عشان راجل بيحترم شغله ومهنته وزمايله، وأنا بالمناسبة أصغر من أستاذ خالد، ده أستاذ من قبل ما أنا أدخل الشغلانة بس هو تعامل معايا بكل أدب واحترام، مش عشاني بس، عشان أخلاق واحترام اتربينا عليها في المهنة دي من واحنا صغيرين".
وختمت الاستايلست منشورها قائلة: "بالمناسبة يا أستاذ، من سنتين كدة كنّا بنعمل فيلم اسمه حملة فريزر مع الاستاذ كريم العدل وحصل مشكلة مع كريم ومشي، وكلم حضرتك عشان تيجي تكمل، وحضرتك روحت برضه، ومرفعتش سماعة التليفون على كريم يمكن عشان هو مخرج صغير، وحضرتك طبعاً مخرج كبير، ربنا يوفق حضرتك وربنا يديك علي قد احترامك لمهنتك وزمايلك".