النجمان الصغيران أحمد ورضوي خالد يعشقان الوقوف أمام الكاميرا .. قاما بأداء عدة أدوار في بعض الأفلام السينمائية ..وأستطاعا في فترة صغيرة أن يصبحا نجوما وكان لي معهما هذا الحوار لأكتشاف ما يفكران فيه. أنتم عندكم كام سنة و في سنة كام ؟ رضوي : أنا في سنة رابعة وعمري 10 سنوات أحمد : أنا في سنة تالتة أبتدائي وعمري 9 سنوات عاملين إيه في المدرسة ؟ الحمد لله كويسين بدأتوا التمثيل من أمتي ؟ رضوي : أنا بدأت وأنا عندي ثلاث سنوات قبل أحمد وكنت بعمل أعلانات في الأول خالص وبعد كده عملت مسلسل كان بيتعرض علي قناة الجزيرة للأطفال أسمه جلا جلا وبعد كده بدأت أعمل سينما وأول حاجة عملتها كان آخر مشهد في فيلم "عريس من جهه أمنية "وقمت بدور حفيدة عادل أمام وعملت في مسلسل " أولاد الليل ومسلسلي لا أحد ينام ونسيم الروح. أحمد : أنا بدأت التمثيل وأنا عندي أربع سنوات وكانت طنط كاملة أبو ذكري طالبة وجوه أطفال جديدة وكان في أطفال كتير متقدمين والحقيقة أنا خفت وماكنتش عايز أمثل بس هي خرجت من مكتبها وأختارتني وكنت بعيط بس هي أتمسكت بيا وساعدتني أني ما أخافش وكان أول دور لي في فيلم "العشق والهوي" مع الفنان أحمد السقا ومني زكي وكنت بمثل دور ابن أحمد السقا وبشري وعملت في فيلم" واحد من الناس "وعلي جنب يا أسطي" وشريف ونص" الجزئين ومسلسل جدو ونيس واللص والكتاب و فيلم "الديلر" وألذ حاجة كانت ونيس وشريف ونص بتحبوا مين من الممثلين الكبار ؟ رضوي :بحب ياسمين عبد العزيز وبحب طنط يسرا وكنت حشتغل معاها في فيلم بالشمع الأحمر لكن حصلت ظروف منعتني من العمل معاها وبحب عادل أمام وأحمد السقا ،أنا مشتغلتش معاه لكن شوفته لما أحمد كان بيشتغل معاه أحمد : بحب أونكل محمد صبحي لأني مثلت معاه في " جدو ونيس" وأونكل عادل إمام واونكل أحمد السقا ،انا بحب ناس كتير قوي بس مش عايز انسي حد . مين بيحضر معاكم التصوير ؟ مامي وأحيانا بابي بيحضروا معانا التصوير ومامي هي اللي بتحفظنا وقت التصوير .عشان نتفرغ للمذاكرة في البيت . مين نجمكم العالمي المفضل ؟ رضوي : أنا بحب براد بت وانجلينا جولي أحمد : عمر الشريف بس في رأيي محمد صبحي ميجا سوبر ستار بتحبوا تمثلوا الأفلام أكتر ولا الأعلانات ؟ رضوي :في أختلاف بين الفيلم والأعلان من ناحية الوقت لكن أنا بحب الأفلام أكتر والسبب فيلم الدادة دودي لأنه كان تحفة وكنا طول الوقت بنضحك ونهزر وكان يوم التصوير بيبقي لذيذ آخر حاجة . وكمان الناس عرفتني عن طريقه وهو أكتر حاجة عجبتني في كل اللي مثلته . أحمد : أنا بحب الأتنين بس الأعلانات فيها ميزة أنها بتآخد وقت قصير مش زي السينما وفي فرق كمان في السينما بنعيد كتير قوي لحد ما المخرج يعجبه المشهد ولازم نحفظ كويس أما الاعلانات بنحفظ وخلاص وكمان الكلام بيكون قليل والأعلانات كل الناس بتشوفها وده بيفرحني ولكن مش بيبقوا عارفين أسمي ،في السينما الناس بتعرف أسمي . ماهو أعلي أجر وصلتولوا له وبتصرفوا الأجر أزاي ؟ حقيقي مانعرفش !ولكن مامي بتجبلنا منه لعب والحاجات اللي بنطلبها وبنحب نروح الاسكيت ( التزحلق علي الجليد ) كتير قوي . مين بيشجعكوا أكتر مامي ولا بابي ؟ الصراحة الأتنين ولكن مامي مهتمة أكتر لأن بابي مشغول في عمله بتتصرفوا أزاي مع المعجبين وهل بيزعجوكم ؟ رضوي : بفرح بيهم قوي لأنهم بيحبونا ولازم أحنا كمان نحبهم .وبفرح قوي لما الناس بتشاور عليا . أحمد :لا عادي انا مش بنزعج خالص بالعكس بفرح وأتعودت أني أسلم عليهم . بتشتغلوا في إيه دلوقتي ؟ رضوي :أنا معنديش شغل دلوقتي عشان الأمتحانات وعندي مذاكرة كتير أحمد : أنا بشتغل في برنامج سات أسمه "اللص والكتاب" بطولتي مع سامح حسين وكمان "شريف ونص" بطولتي مع شريف رمزي وسوسن بدر وراندا البحيري والنجم سمير غانم وريم هلال ودوللي شاهين . هل أشتركتم مع بعض في عمل واحد ؟ عملنا مع بعض مشهد واحد بس في السينما ولكن طلعنا كتير مع بعض في الأعلانات . أمتي بتشعروا بالغرور ؟ لا احنا مش مغرورين خالص بالعكس أحنا بنحب الناس وبنلعب مع أصدقائنا عادي لما تكبروا نفسكم تكونوا زي مين من الممثلين ؟ رضوي : أنا بحب تمثيل طنط يسرا بس أنا مش بفكر أمثل لما أكبر لأني عايزة أشتغل دكتورة أطفال لأني بحب الأطفال قوي ورافضة فكرة أني أمثل لما أكبر ولو حصل حيبقي حاجات قليلة جدا . أحمد : لا أنا لما أكبر مش عايز أبقي ممثل أساسا" أنا عايز أبقي رئيس جمهورية "وأنا قولت الكلام ده لماما سوزان في برنامج حكاية قبل النوم ..وهي قالتلي أجتهد والطريق قدامك مفتوح أحمد بتتكلم جد ؟؟؟ آه والله عشان أنظف البلد وعايز أعمل حاجات كتير تانية . تنضفها من إيه ؟! من كل حاجة زي إيه ؟ لا مش عايز أقول دلوقتي !!