فبعد الفحص والمحص والتمحيص، الساعة الآن الثالثة عصرا، حان موعد قعدة الستات على كل القنوات الفضائية.
خير اللهم اجعله خير تفتح التليفزيون فى التوقيت ده تلاقى ماسورة ستات وانفجرت فى وشك بكل الأشكال والأحجام والألوان، حاجة كده تجبرك وتخليك غصب عنك تستقر على إحدى القنوات دى وتقعد علشان تتفرج.
بعد خمس دقايق من الفُرجة على بعض برامج الستات، بتبدأ غصب عنك تدخل فى مرحلة من مراحل عدم الفهم، بتبقى عاوز تدخل جوه التليفزيون وتسكتهم من كتر ما شتتوك، يا ستى مش إنتى بتقولى إنك برنامج عن المرأة وبيهم المرأة ومحتواه عن المرأة، والرسالة اللى بيقدمها المفروض تبقى للمرأة، طيب إيه اللى هيفيد المرأة لما تيجبى لها ممثل شاب ويحكى لها عن رحلة صعوده مثلا؟!
يعدى نص الوقت وإنت مصمم تتفرج يمكن تلاقى حاجة فعلا تحسسك إن دى برامج عن المرأة، وإن الهدف منها إفادتها والتحسين من مستواها الفكرى والصحى والثقافى والاجتماعى، وفجأة كده وبقدرة قادر تلاقيك دخلت على فقرة المطبخ، وكإن اللى كان ناقص ست البيت الأصيلة هو برامج تعلمها الطبخ، أحب ألفت نظر حضراتكم إلى إن ستاتنا بيعرفوا يطبخوا وحتى اللى مابتعرفش تطبخ فيهم أكيد هتروح تتفرج على القنوات المخصصة للطبيخ ودى ما أكثرها ربنا يزيد ويبارك.
يعدى الوقت وتهل علينا الفقرات الأكثر أهمية وهى فقرة "الموضه والجمال"، وكأن دى الحاجة الخطيرة اللى الست البسيطة فى البيت قاعدة مستنياها وبتتقطع من جواها علشان تتابعها، ما نقدرش ننكر إن فى قطاع من الستات مهتم بالجزء ده، لكن فى قطاع آخر كبير ما يهموش يعرف آخر ما توصلت له صيحات الموضة فى العالم، ومستنى منكم تلمسوا احتياجاته.
طيب أخدنا نفس عميق وعدينا فقرة المطبخ والموضة والممثل الشاب اللى كان بيحكى رحلة صعودة فى برامج المرأة، ندخل بقى على الفقرة اللى فيها الأمل واللى بتتكلم عن العلاقات الاجتماعية وعلاقة الراجل بالست، ذنب الست البسيطة اللى قاعدة بتتفرج عليكى دلوقتى إيه وإنتى بتوجهى لها رسالة من واقع تجربتك الشخصية، يعنى إنتى متخانقة مع جوزك أو مطلقة منه أو كارهاه، تجربتك دى تحتفظى بيها لنفسك، تناقشى فيها حد متخصص، دى مشكلتك إنتى الشخصية، ولو هتقولى لها رسالة يا ستى ذنبها إيه إنك توصلى لها رسالة غير صحيحة من واقع تجربتك اللى ممكن تكون بتختلف تماما عن تجربتها، واللى ممكن تكونى بتوصلى بيها رسالة معينه لشخص ما.
عدينا فقرة نصايح المذيعات وجينا لفقرة المتخصص اللى هيناقشوا معاه فى العلاقات هنلاقى كل البرامج تسيطر عليها نفس العناوين وهى إزاى تاخدى حقك من جوزك لو داس لك على طرف، وطبعا نصايح المختصيين بتكون أكثرها هادمة للعلاقة، وكأن بيوتنا مبقاش فيها غير المشاكل والخناقات بين الراجل والست، فجأة كده برامج المرأة حولتهم لأعداء بيخلصوا حقهم من بعض.
طيب محاولتوش ليه تعلموا البنت إزاى تتعامل مع جوزها صح لما نحس العنوسة اللى هريتونا كلام عنه يتفك؟! طيب مقولتوش ليه للستات انفصلوا بالمعروف وبلاش تفرجوا الناس عليكم؟ ولا هى لازم تديله على دماغه علشان تبقى كده قوية؟! رسايلكم للأسف بقت عنيفة وليست فى صالح المرأة.
كتير جدا من البرامج دى أثرت بالسلب على العلاقات الأسرية، كتير من البرامج دى وصلت الحياة بين الأزواج لطرق مسدودة جدا.
طيب فين بقى الست البسيطة من البرامج دى، استفادت إيه، طيب عرفتوا الست دى إزاى تربى ولادها؟ إزاى مثلا تتعامل مع ابنها المراهق؟ طيب مشوفناش ليه ستات مكافحات من اللى بيربوا وبيعملوا أمجاد علشان يبقوا قدوة لغيرهم فى برامجكم دى، طيب احترام الزوجة لزوجها واحترامه ليها مابنتكلمش عنه ليه، طيب ماتكلمتوش ليه عن مشاكل البنات اللى مالية الدنيا، وفين النماذج الحلوة منهم اللى بتدينا أمل فى الحياة؟
يعنى برامج الستات مبقاش ليها مضمون غير للخيانة وتخليص التار بين الراجل والست مع شوية موضة وطبيخ؟
كنا نتمنى إن البرامج اللى بتتكلم باسم المرأة تبقى أكثر إفادة للمرأة، ولكن ما نراه الأن على الشاشات ما هو إلا برامج تضر المرأة وتوجه لها رسائل خطيرة تؤثر عليها وعلى كل ما يخصها، الرجاء الاهتمام بالمرأة فى البرامج المخصصة للمرأة، لأن الست البسيطة هى من تدفع ثمن هذه الرسائل.