«نشرة أخبار الكهرباء».. تأتيكم برعاية «شباب خايف على مصر»

طرح الشباب إمكانية تحويلها إلى نشرة تذاع فى القنوات أسوة بالنشرة الجوية

«نشرة أخبار الكهرباء».. مبادرة أطلقها مجموعة من الشباب العاملين بجهاز تنظيم الاتصالات الملحق بقطاع الكهرباء عبر الصفحة الرسمية لهم على «فيس بوك»، بهدف خلق بيئة نفسية توضح معدل استهلاك المواطنين للكهرباء، عن طريق بث نشرات إخبارية بشكل يومى بمعدل الاستهلاك المتوقع والحد الأدنى والأقصى للاستهلاك لتفادى انقطاع التيار الكهربائى فى أوقات الذروة.
«أحمر.. أصفر.. أخضر».. ليست إشارة مرور إنما هى مؤشرات حمولة الضغط على معدل الكهرباء يوضحها شريف زهير أدمن صفحة «جهاز تنظيم مرفق الكهرباء» قائلا: «الناس الفترة اللى فاتت بقت بتحمّل على الكهرباء فإحنا بنتابع الألوان اللى بتظهر ونرصد تحركاتها على مدار اليوم، والأخضر ده المعدل الطبيعى للاستهلاك والأصفر إشارة خطر من زيادة الحمل أما الأحمر فبيقول للناس خلاص دى مرحلة تدخل الوزارة إنها هتبدأ تخفف أحمال عن طريق قطع الكهرباء»، فائدة النشرة الإخبارية تعود على المواطنين بالإيجاب على حد تعبير الأدمن عن طريق متابعتهم اليومية للصفحة للتأكد من أن المعدل المتوسط لترشيد الكهرباء كما هو، ويؤكد زهير أن الصفحة بإشراف أعلى لوزير الكهرباء ويتابع قائلا: «الفترة اللى فاتت حاولنا ننظم مع القنوات الإعلامية عشان نذيع النشرة زيها زى حالة الطقس لأنها بقت أهم خصوصا إننا داخلين على شهر رمضان والضغط هيزيد لكن نظرا للظروف اللى مرت بيها البلد فالفكرة مؤجلة».
الأدمن يؤكد أن الفترة المقبلة ستحمل عنوان «الصراحة» ويتابع بقوله: «الناس مابقتش تحب اللى يضحك عليها ويكدب حتى لو فى حاجة بسيطة، وإحنا وضعنا خطة عشان نبقى لحظة بلحظة فى مكاشفة مع المواطن ونقول له إنك لو كانت الكهرباء بتقطع عندك ساعة لو هتتبع نشرتنا ممكن ماتقطعش إلا عشر دقايق بالكتير».