«السيسى» يُظهر «العين الحمرا» للمخالفين: «سحب أراضى وضع اليد قبل نهاية مايو.. مصر مش طابونة»

وجه الرئيس عبدالفتاح السيسى تحذيراً شديد اللهجة لواضعى اليد، وأبدى الرئيس غضبه من ظاهرة وضع اليد على أراضى الدولة المستصلحة، قائلاً: «إحنا مع الاستثمار وتسهيل العمل لكل من يرغب فى الاستثمار، وبنحاول ننظم العمل كدولة، وألا يكون الموضوع ماشى بشكل غير علمى وغير منظم، وبالتالى وضع اليد اللى موجود على الأراضى مش مقبول ولن نقبله».
وكلف «السيسى»، خلال زيارته محافظة قنا لافتتاح عدد من المشروعات أمس، القوات المسلحة والشرطة بإنهاء ظاهرة وضع اليد بنهاية مايو الحالى، وقال: «مش هيبقى مقبول فى مصر تانى، ومحدش يمد إيده ويقول الأرض دى بتاعتى وهى بتاعت مصر، وهى مش طابونة اللى عايز حاجة ياخدها»، مطالباً الجيش والشرطة بإعطائه «تمام» بإنجاز المهمة بنهاية الشهر الحالى، واستعادة الأراضى المغتصبة بالكامل، واستطرد غاضباً: «آخد تمام باستعادة الأراضى بالكامل، واللى يتكلم على المحكمة على طول»، ووجه الرئيس بمراجعة مواقف أراضى وضع اليد على مستوى الجمهورية بالكامل، مؤكداً إنهاء وضع اليد على 25 ألف فدان فى قرية المراشدة بقنا.
الرئيس من قنا: «اللى زارع أرضه يقنن وضعه ويدفع دلوقتى.. واللى مش زارع الأرض ترجع فوراً»
أضاف الرئيس: «أنا بصراحة زعلان قوى فى الموضوع ده، إن حد ياخد أراضى مصر وناس مش لاقية تاكل، وناس تمد إيديها ب10 آلاف فدان، و20 ألف فدان ياخدوهم ويقولوا دول بتوعى، والله العظيم ولا فدان واحد»، وتابع: «من فضلكم ده تكليف للجيش ووزارة الداخلية، اللى زارع أرضه يقنن وضعه ويدفع دلوقتى، واللى مش زارع الأرض ترجع فوراً، وتنضم لشركة الريف المصرى لإعادة توزيعها على المواطنين».
وافتتح «السيسى» أمس، عدداً من المشروعات فى الصعيد عبر «الفيديو كونفرانس»، خلال زيارته إلى قنا، أبرزها كوبرى طهطا العلوى أعلى السكة الحديد بسوهاج، وكوبرى الكباش بالأقصر، وثلاث شون لتخزين القمح، وعدد من وحدات الإسكان الاجتماعى والمميز وكوبرى نجع حمادى الجديد فى قنا.
وطالب الرئيس الدكتور هشام عرفات، وزير النقل، بسرعة إنهاء 3 محاور يتم تنفيذها على النيل، كما طالبه بالكشف عن الدخل السنوى للسكة الحديد، قائلاً: «دخلها كام يافندم فى السنة؟.. قول لو سمحت؟»، ليؤكد الوزير: «الفرق فظيع».. فالتشغيل يصل ل4 و5 مليارات جنيه، بينما لا تتجاوز الإيرادات 2 مليار، وقال الرئيس: «المشكلة أن المسئول يتحدث دون أن يعلن الحاجة هتتكلف كام وهنجيب منين، ونسيب الناس تتفرج علينا ولما نقول هنزود التذكرة جنيه يقول لك أنا غلبان مش قادر.. طيب أنا كمان غلبان مش قادر».