أديب ساخرا من "رامز": "إديني ال100 ألف دولار وهاجي معاك.. دا الجمهور واكلها وساكت"

قال عمرو أديب، إن برنامج "رامز بيلعب بالنار"، هو الأخير في سلسلة برامج المقالب، التي يقدمها الفنان رامز جلال، مستكملًا: "أظن إن دي آخر مرة هيلعب فيها رامز بالنار، دي لعبة قرر الخوض فيها رامز والمنتجين والفنانين المشاركين وإحنا كجمهور وهتنتهي".
وكشف أديب، خلال تقديمه برنامج "القاهرة اليوم"، عبر قناة "اليوم": "النهاردة راغب علامة كان بيطفي النار بنص زجاجة مياه معدنية، أنا معاك يا رامز إن كلنا مبسوطين، جمهور وشركة إنتاج، وكله زي الفل، بس يا رامز الجمهور واكلها وهو ساكت، بس مش هيستمر".
وتابع: "لولا القدر، لكنت أحد ضحايا هذا الموسم من رامز بيلعب بالنار، جبني السنة الجاية واديني ال 100 ألف دولار، هتبرع بنصهم للجمعيات الخيرية، وهعمل إني خايف وهصوت وهضربك كمان، إن شالله تقولي نط من فوق البرج، بس الباراشوت يفتح يا رامز".