قوى ثورية تدعو لمسيرات بجميع الشوارع غدًا لرفض الاستفتاء على الدستور

دعا تحالف القوى الثورية جموع الشعب المصري، للمشاركة في مسيرات حاشدة بكل شوارع مصر غدًا الثلاثاء 4 ديسمبر لرفض قرارات 22 نوفمبر، ورفض الاستفتاء على الدستور الحالي من فعاليات مسيرات الإنذار الأخير لقصر الاتحادية والتى دعت لها القوى المعتصمة بالميدان.
وطالب التحالف عبر صفحته الرسمية على "فيسبوك" المشاركين بعدم التقيد بالمسيرات الرسمية المعلنة وتنظيم مسيراتهم الخاصة، من الشوارع والأحياء التى يقطنون بها، مضيفًا "إنزل أقف أنت وجيرانك وأصحابك على الشارع العمومي القريب من بيتك ارفع علم .. اهتف .. صور بموبايلك الوقفة.. وشارك وأبعتلنا الفيديو والصور، خلي الناس كلها تشوف مليونية في كل شارع في مصر، ولو ساكن على الشارع العمومي أرفع علمك في البلكونة وخلي أهلك يقفوا فيها..انشر وقول لكل أصحابك .. حزب الكنبة لازم يتحرك".
فيما دعا ائتلاف "ثورة اللوتس" أن يكون يوم غدا هو يوم للحداد على قرارات الرئيس، مطالبا المشاركين فى فاعليات مسيرات غدا بارتداء الملابس السوداء وتعليق الرايات والأعلام السوداء على أسطح المنازل والشرفات والسيارات، تعبيرا عن رفض القمع والاستبداد.

وأضاف الائتلاف "قام الشعب المصرى العظيم بثورة و ضحى بآلاف الشهداء والمصابين عشان العيش و الحرية و العدالة الاجتماعية، وافتكرنا إن البلد رجعتلنا، لكن للأسف ظهر تجار الدم والدين عشان يسرقوا بلدنا ويرجعونا لأسوأ من أيام مبارك".
استطرد قائلاً: "عشان يكون عندنا رئيس جمهورية مش ديكتاتور، عشان البلد يكون فيها قانون مش فرعون بيلغي المحاكم والقانون، عشان نمنع قرض ب 40 مليار جنيه عمرنا ما هنقدر نسدده و هيخلى عيشتنا ذل و مرار، عشان العدل، وعشان حق ولادنا إلي راحوا ضحية فى أسيوط و بورسعيد، و ماسبيرو و محمد محمود، عشان نحصل على العدل مش على تعويض و فلوس غرقانة دم".

وتابع "عشان حقي وحقك، عشان الدم اللي سال علي أرض مصر وحقه اللى لسه مجاش عشان بلدنا بتتسرق مننا عشان ثورتنا، يوم الثلاثاء 4\12 البس أسود على قرارات مرسى، وعلق رايات سودًا علي البلكونات والبيوت و العربيات، ارفض القمع والاستبداد وخلي الناس تعرف موقفك".