السيسي يقاطع وزير التنمية المحلية: «ناقص 300 ألف فدان تعديات.. وضعهم إيه؟»

قاطع الرئيس عبدالفتاح السيسي، المهندس هشام الشريف، وزير التنمية المحلية، أثناء عرض جهود الحكومة في استعادة أراضي الدولة، وسأله عن مصير 300 ألف فدان لم يذكرها في العرض الخاص به.
وقال الرئيس السيسي: «فيه 1.9 مليون فدان تم حصرها، وتمت استعادة 919 ألف فدان، والمفروض يبقى فيه مليون موقفها مختلف، وهناك 300 ألف فدان لم يتم ذكرها، يعني لم تُذكر في الأراضي المطلوب تقنينها، أو التي استعادتها الدولة، وضعهم إيه؟».
فرد عليه «الشريف»، قائلا: «ال300 ألف فدان عليهم مشاكل يا فندم، وجارٍ دراسة تلك المشاكل وعمل تقرير بها».
فواصل السيسي حديثه: «عندنا 65 مليون متر أراضى تم الاستيلاء عليها والبناء عليها، وأنا لما باتكلم في النقطة دي بنوضح النقطة دي للشعب المصري، وبنقول لما اتحركنا التحرك ده، وانفعلنا عليه لم يكن نابعا من غضبة كده، لأن السيد المساعد المهندس إبراهيم محلب شغال في الموضوع ده من سنة، وبيبذل جهد كبير لتقنين الأوضاع لاستعادة أراضي مستوْلَى عليها سواء زراعية أو بناء، خلال السنة دي».
وأضاف: «من 5 شهور تم تكليف الشرطة والجيش بالمساعدة في استعادة الأراضي، ولكن ماتعملتش حملة إعلامية كبيرة عشان الإجراءات تمشي، ولكن الجهد اللي اتعمل لم يكن كافيا أمام التحدي، عايز أقول للمصريين: فيه ناس بتقولِّي بلاش تتكلم في الأرقام والأموال، لأن الناس بتتصور لما بنقول هنقنن أوضاع 65 مليون متر هناخد أرقام هائلة كأموال، الناس بتبقى خايفة إننا بندي للشعب آمال وطموحات مش في محلها، ولكن عايز أقول للمصريين: الدولة بقت مسؤولة عن عمل مرافق ل65 مليون متر، وهي لم تخطط لذلك!».
واستطرد: «الدولة دلوقتي بقى مطلوب منها تدخل على ال65 مليون متر، وتعملِّهم مرافق شوارع وبنية أساسية وصرف صحي ومياه شرب وكهرباء وخدمات أخرى، ولو قلت أنا محتاج أعمل الكلام ده ل65 مليون بنية، يعني عايز 65 مليار جنيه عشان الناس اللي عايشة على الأرض دي، أقدر أوفر لهم شكل مناسب وشكل حياة مناسبة، أنا هاعمل إيه في ال65 مليون متر، هعملّهم مرافق إزاي وأخلِّى الناس اللي عايشة فيهم شكلهم كويس، وعشان الناس اللي عايشة فيهم ميقولوش الدولة سايبانا ليه، ويبقو ناقمين على الدولة».
وتابع: «لازم أعترف إن فيه تجاوزات في الموضوع أثناء تنفيذ التعديات، بسبب الحماس ممكن، تضارب وتداخل ممكن، لكن يهمني أوي الناس في مصر والمحافظات تعرف إن الموضوع لم يكن على مستوى المحافظين وقادة الجيش والشرطة بس، ولكن الشباب أيضا مشارك، واللي هيقولِّي عليه الشباب هانفذه، لأنها مش حاجتي ومش حاجتنا، دي حاجة أولادنا وأولاد أولادنا».