بالفيديو..قائد عسكري في حضور السيسي: على الشعب إصلاح نفسه والجيش لن ينقلب

بث ناشطون على مواقع التواصل الاجتماعي "فيس بوك" مقطع فيديو صباح اليوم الثلاثاء يظهر فيه أحد القادة العسكريين يلقي محاضرة لحشد من رجال القوات المسلحة في أحد الكليات العسكرية بحضور الفريق أول عبد الفتاح السيسي، وزير الدفاع، والفريق صدقي صبحي، رئيس أركان حرب القوات المسلحة، واستنكر فيها الدعوات التي تطالب الجيش بالانقلاب على الرئيس محمد مرسي، وقال: "الناس عايزانا كل يوم نعمل انقلاب".
وطالب القائد العسكري مبروك حمدي في محاضرته الشعب بإصلاح نفسه لكي ينصلح حال الحاكم، مذكرًا بحديث قدسي يؤكد على أن صلاح الحاكم يأتي من صلاح المحكوم، مما يلقي بالكرة في ملعب الشعب بأن يغير من نفسه ينصلح حاله ليحقق له الله صلاح الحاكم.
وشدد على أن الرئيس الراحل جمال عبد الناصر لم يقم بانقلاب على الحاكم، لأنه كان هناك مستعمر للأرض يستعبد البشر وكانت هناك رغبة شعبية بنسبة 100 % تريد الخلاص من هذا الوضع.
وتساءل القائد العسكري: إيه هي علاقة الشعب بالحاكم؟..ربنا قال"إنه يؤتي الملك لمن يشاء وينزع الملك ممن يشاء".. وقال الله في حديث قدسي "إنني أنا ملك الملوك وقلوب الملوك في يدي..إذا أطعتموني جعلتهم عليكم نعمة، وإذا عصيتموني جعلتهم عليكم نقمة، فلا تنشغلوا بسب الحكام، ولكن انشغلوا بطاعتي أعاقبكم عليها".
وأوضح: هي دي العلاقة ما بين الشعب وأرضه والشعب وحكومته..يبقى الاتنين صح من عملكم سلط عليكم صح..وإذا صلح الحاكم صلحت الرعية..الاتنين صح..لكن متى؟...حينما نبدأ نبني صح..فإحنا لما نيجي نبني عمارة بنبني من أسفل إلى أعلى..ولما يكتمل البناء على أساس قوي نبدأ مرحلة التشطيب.
وأكد: "مرحلة البناء دي لازم اللي يقوم بيها الشعب، ويبني على نظافة..ما يبنيش على أساس ضعيف..وأول ما نوصل للقوة..ويكون فيه شعب قوي متماسك مترابط..مفيش اتنين بيكرهوا بعض..مفيش تفرقة لأي سبب طائفي أو لون أو لغة أو حضر أو مدني أو فلاح أو صعيدي أو غيره..دي بتعطي قوة بشرية للدولة..من هنا تبدأ مرحلة التشطيب..فييجي الحاكم الصالح ينزل من الدور الأخير يشطب..أدي عدل..أدي مساواة..أدي حرية..أدي كل المعاني الجميلة اللي الشعوب بتطلبها من حكامها.
وأوضح: هي دي المعادلة..معادلة سهلة خالص..لا فيها كلاكيع ولا إكس تربيع...سهلة خالص 1 +1= 2..لو انصلح حالنا ربنا هيصلح لنا حال الأرض والحاكم ..لو لم ينصلح حالنا سيفسد لنا الأرض والحاكم..يعني الكرة دلوقتي في ملعبنا إحنا..إذا كنا قمنا بثورة وغيرنا الأنظمة فإحنا ما غيرناش أنفسنا..فكل واحد لازم يغير نفسه ويبدأ بنفسه..وما يقولش الدنيا ظلام حولي وأنا وحدي هعمل إيه؟..أنا بقوله مالكش دعوة ..لا تلعن الظلام الكثيف ولكن أوقد شمعة هتنور لنفسك وتنور للي حواليك..إتعلم توقد شمعة..ولو كل واحد ولع شمعته مش هنقعد في الظلام ولا نلعن فيه.
وقال: أنا عرضت هذه النماذج لأن فيه ناس بتقول ليه الجيش ما يعملش انقلاب؟..وكأنهم كل يوم عايزين الجيش يعمل إنقلاب!!..وأنا أسف إني بقول هذه الألفاظ لأنها متداولة على ألسنة الشباب النهاردة..وأنا بقولهم يا ابني عشان يحصل استيلاء على السلطة بشكل غير شرعي فيه أشكال مختلفة.. إما بيكون فيه حركات من ناس بتتنزل تطلب تغيير محدود..أو فيه انقلابات من الجيش أو الشرطة..وفيه ثورة يقوم بها الشعب..واللي بيقولوا إن جمال عبد الناصر عمل انقلاب..أنا بقولهم إن جمال عبد الناصر عمل انقلاب لأن كان فيه مستعمر يحتل الأرض ويستعبد البشر..وكانت هناك رغبة شعبية من 100% من الشعب المصري بيحلموا بيها من سنين أن يخلصوا من هذا المستعمر..وجاء الجيش العظيم بعد حرب 1948 وتأججت بداخله النار وتعددت الأسباب لقيام هذه الثورة.. فقام بها الجيش وفي لحظة تحولت إلى ثورة شعبية التف فيها الشعب حول جيشه وغيروا شكل الحياة في مصر.