دعاء فاروق توجه رسالة قاسية للفنان كريم فهمي بسبب " أزمة منتصف العمر"

هاجمت الإعلامية دعاء عامر، مسلسل "أزمة منتصف العمر"، وذلك من خلال حسابها بموقع التواصل الاجتماعي "فيس بوك".
كتبت دعاء، "طيب يا جماعة حد مستني النهاية في سواد منتصف النيلة المستنقع اللي بنتابعه .. انا بالنسبة لي وبالاصألة عن نفسي كده جاب الناهية خلاص … فاضل تلات حلقات او حتي عشرة دى كلها شكليات المسلسل خلص والستاير السودا نزلت موتتوا بصيص الفرحة الوحيد و قتلتوا سرسوب أي أمل كنا مستنيينه يظهر".
أضافت، "حد يفكرني كده … هو كريم فهمي كان زعلان إن الناس متضايقة من الاحداث الكحلي اللي بتحصل وبيقول علينا لمؤاخدة لجان !!! ألا هو انت يا كريم كنت عاوزنا نتابع المسلسل ونفرح ؟؟؟ هل كنت مستني الناس تتبسط بالاحداث مثلا ؟؟؟ لا بص يا كريم غالبا حصل عندك لبس في الموضوع … انت المفروض تتبسط اننا بنتابع … وتفرح اننا بنتفرج وكفي … وده قمة النجاح اللي يلزم أبطال العمل إن المسلسل متشاف وشكرا … تمثيلكم كلكم رائع وشكرا … ومحدش قال انكم مش بتمثلوا هايل كلكم بتلعبوا في الاهلي يا سيدى".
تابعت، "وبعد الحلقة الاتناشر اللي بليتونا بيها انت وريهام ورنا رئيس ورشدى المهدى وعمر السعيد تقدروا تحترفوا في ليفربوول بجدارة … إنما مفهمتش هل انت كنت عاوز الناس تشكر في الأفعال غير المبررة اللي بتعملها الشخصيات الحزينة دى ؟؟؟ منين جبتوا الثقة دى مفهمتش حتي لو موجودة في الدنيا".
أردفت، "حد قالك ان احنا بنسقف لهم ؟؟!!! .. حد اتبسط مثلا لما البنت بتاعت بورسعيد قتلت أمها بالاشتراك مع صاحبها ؟!!! حد كان فرح لما الواد قتل نيرة اشرف ؟؟؟ ماحنا عارفين والله العظيم ان المجتمع فيه أمراض نفسية وأفعال كتير غير مبررة والدراما ممكن تنقل ده … بس لما نتفرج علي الأفعال المريضة اللي وراها أمراض نفسية متلتلة لازم الناس تستنكر وتضايق وتكتب وترفض وتشجب وتنتصر للافعال السوية وللناس الاسوياء".
أكملت، "كريم اتضايق جدا ان بعض الناس قالوا ان فيه زنا محارم وهم لسه مشافوش المسلسل لآخره … طيب احنا اسفين يا كريم … طلع زنا بس … المفروض الناس تسقف يعني للعلاقة غير السوية اللي بين فيروز وعمر ؟!!!! ماتسيبوا الناس ترفض يا اخي براحتها هي بترفض عمر غير السوي اللي خرب الدنيا .. الناس ما رفضتش كريم ولا غلطت في كريم … ما طبيعي الناس ترفض التصرفات غير المبررة وترفض الزنا غير المبرر بين فيروز وعمر وأي محاولات تبرير او تعاطف من عينة أصلها مش امها ، أصله طلقها ، ده نقوله عند الدكتور النفسي بقي لو ظبطنا نفسنا بنقول كده لأننا هنبقي عاوزين حاجة مش طبيعية تحصل".
أوضحت، "الطبيعي ان الناس ترفض محاولات النصب لزياد وترفض ضربه لمراته وترفض تصرفات عزت مع فيروز .. ده اكتر واحد مريض نفسي في العيلة بالعملية اللي عملها ، وبالسر غير المبرر لما خبي علي بنته إن أمها ماتت … صحيح قطع قلبي في الحلقة الاتناشر اللي اتنكدت بسببها وشايفة انها نقلت المسلسل من منطقة الساسبنس لمنطقة سواد غميقة ضايقتنا جدا وقبضت قلبنا وانا هنام متنكدة النهاردة يا أساتذة بسببكم".
واختتمت، "خدوا انتو النجاح وسيبونا نعبر عن النكد والسواد اللي اتسببتوا فيه .. اتبسطوا بالترندات والبوستات والمقالات والفيديوهات حتي لو بتشتم في الأشخاص والأفعال لأنهم لازم يتشتموا كلهم ولا تحبوا بالمرة نسقف لسلمي المدمنة ونزرغط لياسمين اللي ماشية تصطاد رجالة كبار … سيبونا بقي في الوحلة اللي وحلتونا فيها مش عارفين نخرج مستنقع منتصف النيلة".