علّقت الإعلامية مفيدة شيحة، على التصريحات التي خرجت من بعض الشخصيات العامة، والتي تدور حول المرأة. وقالت مفيدة شيحة، خلال تقديمها لبرنامج "الستات" علىى فضائية "النهار" مساء السبت: "بقالنا كام يوم، الدنيا قايمة مش قاعدة بسبب تصريحات لعدد من الشخصيات عن شوية حاجات كدا المرأة مش ملزمة بيها، زي إنها؛ مش ملزمة تخدم جوزها، مش ملزمة تطبخ له، مش ملزمة تقوم بالأعمال المنزلية بشكل عام يعني، وكانت أكتر حاجة مثيرة للجدل إنها مش ملزمة ترضع ولادها، وإذا عملت كدا تاخد أجر". وأضافت:"الحقيقة التصريحات دي عملت جدل وانقسام كبير جدا في المجتمع، حتى عند الستات نفسهم، شوفنا طرف مبسوط بالتصريحات دي وشايف إن المرأة مش ملزمة وإنها بتعمل دا كنوع من التفضل على الرجل، وفي المقابل فيه ستات تانية شايفة إن الست بتعمل الحاجات دي بالفطرة، مش علشان مجبرة عليها". وتابعت: "أما الرجالة بقى فبعيدا عن كام واحد يتعدوا على صوابع الايد الواحدة شايفين إن الست فعلا مش ملزمة بالحاجات دي، فالأغلبية شافت إن الست لو شايفة إن كل اللي بتعمله في بيتها نوع من التفضل على الرجل، أو إنه مطالب يدفع أجر على كل حاجة بتعملها الست في البيت، يبقى إيه لازمة الجواز نفسه، وهنا بقى هو الخطر". وأكملت: "علشان كدا بنطرح سؤالنا النهارده اللي بيقول: "هو لما بيتقال للست على حاجات معينة "دا حقك ولازم تاخديه".. بتكون فعلا نصيحة علشان مصلحتها وتاخد حقوقها المهدرة ولا فخ ممكن بسببه يحصل خراب في بيوت مستقرة؟". واختتمت حديثها قائلة: "إن الحقيقة يمكن الموضوع أخد أكبر من حجمه بكتير وخرج عن السياق بتاعه، واتحط في سياقات كثير مختلفة، وبقى كل من هب ودب بيتكلم فيه ويفتي، ومش كل ترند يظهر يصح ان كل الناس تتفاعل معاه بكل الفوضوية دي! دا غير أن مش معقول كل الناس متخصصة في كل حاجة".
