مفاجأة جديدة يفجرها "شوبير" بشأن سرقة الكؤوس

فجر الإعلامى أحمد شوبير، مفاجأة بشأن براءة حريق اتحاد الكرة من واقعة اختفاء كؤوس المنتخب الوطنى، مؤكدًا أنه سوف يفتح ملف المخازن ومحاضر مجالس الجبلاية والأرشيف خلال الفترة المقبلة.
وقال شوبير عبر برنامجه الإذاعي قائلا "كنت أول من فتح ملف اختفاء كؤوس المنتخب ومعرفش الناس قالت ليه إنى بتهم أحمد حسن، ده أنا بدافع عنه وقولت إنه رجع الكأس".
وواصل: "اتصلت بيه وقولت هو معقولة يا أحمد كابتن منتخب مصر ياخد الكأس، الناس بتقولك كلام غلط أنا بدافع عنك وأنت مش متهم أساسًا، ولكن بحاول أقولهم إنك رجعته قبل مايقولو ده موجود عند الصقر".
وأستكمل شوبير: "بعض الناس خارجين يتهمونى ويقولولى بتتكلم دلوقتى ليه، بقولهم بتكلم عشان فى إهمال وأنا مجبتش سيرة حد أنا منتظر تحقيقات الوزير اللى هيعملها انهارده وهيعلن نتيجتها، لأن الكؤوس اللى اتسرقت وقت الحريق رجعت واللى عايز التفاصيل أقولها بالأسماء، وأنا لسه مفتحتش موضوع المخازن لكن هتكلم فيه ودون تجاوز، هقول كل اللى حصل بالصح وبالحق".
وأردف شوبير، "مدير الاتحاد وأعضاء مجلس سابقين بيتهمونى ويهاجموا لجنة خماسية جاية تحط نظام بعد عصر السبهللة اللى كان فيه اتحاد الكرة، وعلى فكرة السنة الجاية مئوية اتحاد الكرة الذى تم تأسيسه فى 1921 أراهن أى مسئول لو تم التوصل لأى شريط فيديو لمنتخب مصر حتى فى كأس العالم 90 مش هقول قبل كدا، هيجروا على سمير عدلى يبعتلهم لقطات".
وأنهى حديثه:"اتحاد الكرة لا يملك أرشيفا كاملا لمحاضر مجالس الإدارة، الأهلى مثلا يفتخر بامتلاكه أول محضر لأول اجتماع لمجلسه، إنما اتحاد الكرة ثلاثة أرباع محاضره لا تكتب من الأساس لأنها لا تعرض على الوزارة، واللى شايف كلامى غلط يطلع يرد ويتحدانى وهيقولوا الربع اللى فاضل اتحرق فى الطوفان، ما هو الحريق هو المنقذ لكل أزمة دلوقتى مع أن الكؤوس لا تحرق".