حكايات فريق واما مع التمثيل والغناء

كشف أعضاء فريق واما، على خطواتهم الفنية الماضية والقادمة من خلال حلولها كضيوف في الجزء الثانى من برنامج "معكم" الذى تقدمه الإعلامية منى الشاذلى، المذاع على قناة Cbc، وتحدث أحمد الشامى عن دوره في حكاية "بيت عز" بمسلسل "إلا أنا"، قائلا: "كنت متردد جدا في الدور، لإنه دور متحرش ونصاب ومزور، ولما اتكلمت مع مراتى قلتلها أنا مش عاوز أعمل الدور ده".
وتابع الشامى: "كنت بفكر أعمل ولا معملهوش وكلمنى أمين جمال وقالى روح امضى بكرة أنا عارف إن الموضوع شائك بالنسبة لك، وفعلا روحت مضيت وعملت الدور، وقلنا بقى كل ما اتشتم أكتر كل ما أنا كدة نجحت أكتر".
وأضاف الشامى: "في مشهد ضربى بالقلم، كان رشدى الشامى متوتر ومكنش عاوز يضربنى، وأنا سخنته قلتله أنا راجل متحرش واتحرشت ببنتك وضربنى، ودى أول مرة في حياتى انضرب بالقلم، وطلعت برة بعد كدة دمعت لإنه شيء مهين جدا ولكن من أجل أكل العيش".
وروى أحمد فهمى موقفا جمعه بأصدقائه في فريق واما في السابق قائلا: "زمان في بدايتنا في وقت من الأوقات كان عندنا حفل في الأردن وكل واحد قابض مثلا ألف دولار مقفول مفيش كسور، وكنا متجمعين فى غرفة نادر حمدى وكلنا جعانين بس مش عاوزين نجرح الفلوس".
وأضاف فهمى: "نادر حمدى طلب أكل وكان في مكرونة بولنيز بس هو مش بيحب ياكل العيش، فقلناله احنا هناخد العيش انت كده كده مش بتاكله ووزعنا العيش على نفسنا ووروحت مقطع لقمة واحدفها في طبق المكرونة عشان تتبل بالصلصة وأكلها".
وتحدث أحمد فهمى عن دوره في مسلسل "الاختيار 2"، قائلا: "المخرج بيتر ميمى كان كلمنى في وقت الاختيار 1 وقالى عاوزنى ضيف شرف بس كنت وقتها مربى دقنى وقلتلها مش هاقدر واعتذرت".
وأضاف أحمد فهمى: "بعتلى وقت مسلسل الاختيار 2 وقالى هتحلق دقنك وقلتله تمام، لأن كمان عرفت إنى همثل وكمان لما قالى إن التمثيل مع أحمد مكى أغلب مشاهدى فانبسط جدا لإنه صاحبى جدا، والاختيار أى حد يتمنى أنه يظهر فيه".
وتابع : "عاوز أوجه التحية الكبيرة للمخرج بيتر ميمى لانه مخرج شاطر أوى وبيهتم بتفاصيل التفاصيل والموضوع مش سهل لأن الأكشن بكل تفاصيله والتفجيرات من أصعب المشاهد اللى ممكن تتعمل".
واستكمل : "أنا وأحمد مكى تدربنا على مسك السلاح وقعدت 3 أيام عشان اتعلم إزاى أتحرك بيه وامشى، والمفروض إنى أتصاب في دراعى وامسكه في إيدى التانية والسلاح تقيل، وكان في معلومة أول مرة أعرفها إن لما تحط عينك على سلاح القناصة لازم يكون الاتنين مفتوحين مش نقفل عين زى ما كان كلنا عارفين".