اهتمام وزارة الصحة بضيوف مهرجان القاهرة السينمائي يسبب ثورة علي فيس بوك.. الغلابة يشتكون.. بلد فيها وباء وعامله تجمع وكمان ما شاء الله بتأمنه

أثار اهتمام وزارة الصحة بالإجراءات الوقائية والاحترازية، بمهرجان القاهرة السينمائي الدولي المقام في الفترة من 2 حتى 10 من شهر ديسمبر الحالي بدار الأوبرا المصرية بالقاهرة، غضب آلاف المواطنين الذين أرسلوا شكاواهم وهمومهم عبر فيس بوك علي حساب وزارة الصحة، وننشر لكم هنا بعض من تعليقاتهم حول ما تنشره الوزارة من أخبار حول المهرجان.
قالت Mema Elhakeem : "طبعا المهرجان والممثلين اهم .. بلا تعقيم للمدارس والجامعات ووسائل المواصلات .. دول رعاع من عامه الشعب ... أما الممثلين ثروه قوميه .. واللى بيتعب منهم بيلاقى افضل مستشفى.. وافضل رعايه مالنا سوى الله فى هذه المهنه .. فهو نعم المولى ونعم النصير.. لله الامر من قبل ومن بعد.. ربنا ما يحوجنا غير لوجهه الكريم".
قالت Nadia Elkhayat : "وكان لازمته ايه مهرجان النيله .. هى فضايح وخلاص.. والله يادكتوره هاله تعملى فينا جميله وتأمنى لنا المسجد ولو يوم واحد وبعد كده ابائى اقفليه".
قال محمود ابوشبكه : " طيب وبالنسبة لبعض المدارس المعفنه اللى عندنا .. دى حتى يوم الانتخابات المفروض يكون فيها تعقيم ومحصلش اى نوع من ده.. ولا حتى عمال النظافه.. ولا على بالهم ومديرة مدرسه عندها لا مبالاه فى كل حاجه.. ياريت نظره لقرى وارياف الصعيد والا احنا مش فى مصر والا ايه".
قالت:Marwa Arafat :" مهرجان ايه وزفت ايه .. حرام عليكم .. التجمعات دى اللى بتنشر الوباء.. منكم لله".
قالت Rodina Nassar: " برافو فعلا دي حاجه مهمه جداا .. بلد فيها وباء وعامله تجمع وكمان ما شاء الله بتأمنه".
قال Khaled Noh ALhwety : "يعنى الممثلين وضيوف المهرجان محتاجين المسحه المجانيه دى.. في غيرهم اولى واهم".
قال Ahmed Eissa :" ياريت تهتموا بالشعب المصري وتسيبكوا من الفنانين ولاعبين كرة القدم اللي لا يقدموا شيئ للبلد سوي العري والأفكار السيئة ويستطيعوا الإنفاق علي أنفسهم ..
إهتموا بالأطباء وخط الدفاع الأول ضد الوباء ..
إهتموا بكبار السن فقدموا سنين عمرهم في خدمة هذا الوطن
إهتموا بالشباب لأنهم وقود هذا البلد المستقبلي".
قال مصطفى جاويش : هل قامت مديرية الصحة بالقاهرة بفحص PCR لألف مشارك فعلا كما ورد بالتقرير؟؟؟
على حساب مين ؟؟؟
1000 مشارك ×1200 جنيه للفحص يعنى 1.2 مليون جنيه
إهدار مال عام
وهل يتم فحص اعضاء الفريق الطبى المواجه للعدوى فعلا".
قالت Mervat Elwan :"عقبال توفير المسحة الغلابة ومراقبة مستشفيات الحكومة والذل اللى فيها للغلابة".
قال محمد محمود : "المراقبة الصارمة لمرافق المواصلات العامة
النقل العام
الميكروباصات
التاكسي
النقل الخاص الجماعي
والمخالف يتم تغريمه
بشراء علبة كمامات إجباري".
قالت مروه سعيد النجدى :" واحنا فين من الاهتمام ده ..الشوارع اللي كلها زباله وعدم لبسه الكمامه وعدم الرعايه الصحيه".
قالت ام الغاليين : "طبعا الممثلين أهم امال اية.. حيفكرو ف الشعب الغلبان لا طبعا آلهوانم أهم ".
قال Mohamed Nasser Eldeeb : "ياريت تروحوا تلقوا نظرة على المترو الصبح والمواصلات العامة والأسواق بالمرة ده لو عرفتوا توصلوله وتعرفونا ايه اللي عملتوه للحد من انتشار الفيروس في ظل أكوام اللحم وعلب السردين".
قال أبؤ أدم :" فكره جميله جداا وبصفتي مواطن مصري له حق الانتفاع من وزارة الصحة وتقديم الخدمات الصحيه والارشاديه له وهي وزاره خداميه للمواطن وليس العكس اريد تعميم الفكره في كل انحاء الجمهورية تحت إشراف الوزاره ولا لازم اكون من مدنتي ولا الجونه عشان يبقي فيه اهتمام بصحة المواطن.
قال Ahlam Mohamed: طب أمنوا الدكاتره اللى بيموتوا كل يوم ولا المعلميين اللى انتشر فيهم المرض كالنار فى الهشيم
كل يوم بنفقد العشرات فى الطب وفى التعليم ده طبعا غير عامه الناس ده لو اعتبرتهم الدوله ناس وسايبيين كل ده اللى الأمم بتتقدم بيهم ورايحيين تأمنوا الممثليين والممثلات حسبنا الله ونعم الوكيل فى أمه ضحكت من جهلها الأمم".
قال Adel Badel : بقى بالذمة ده وقت مهرجنات في عز عدوى كورونا ..احترازية ايه و بطيخ ايه ...دي ناس بتهرج ...لا حول و لا قوة الا بالله ..ربنا يهديكم".