تنشر "الموجز" شهادة محمد صلاح واحد من أبناء التيار الإسلامي عن المتظاهرين فى مليونية الأمس أمام قصر الاتحادية ووجهة نظره وهذا نصها: إمبارح كنا خارج مع مجموعة أصدقاء وكان فى مكان معين شوفنا فى التليفز يون الحشد الفظيع بتاع الاتحاديه وأن الشرطة جريت من قدام الحشد الكبير قولنا يالا بينا نروح نتفرج وقعدنا نلف وسط الناس نسمع ونشوف .....لقينا كلام غير بتاع الميديا ودى حاجة مش غريبة طول عمر الميديا إما بتكبر حاجات أو بتصغر حاجات أكاد أجزم أن أكتر من 95 % من اللى هناك ناس نضيفة ومحترمة جداا وليهم وجهة نظر أتفقت أو اختلفت معاها دى حاجة ترجعلك لكن فى النهايه ناس محترمة مصريين وشايفين حاجات مش عاجباهم ومفيش أى رد أو اهتمام للحاجات اللى عاوزينها ..ناس كتييييير جدااا منهم كانوا أنتخبوا مرسي على فكرة واعرف منهم ناس مشاكلهم أن مرسي دايما بيخاطب أهله وعشيرته بس وشم بيكلم الناس دى مشاكلهم أن شايفين حاجات غلط بتحصل وملهاش تفسير وهما مش إخوان أو إسلاميين عشان يحسنوا الظن بمرسي ..هم الجزء الاخر من الشعب اللى أنتخبك وعاصر على نفسه لمونة فمش لازم كمان يحسن بيك الظن ...خلى أفعالك يا مرسي هى اللى تعمل كده مشاكلهم أن حضرتك قولت مفيش إستفتاء على الدستور غير عندما يتوافق عليه الشعب وده محصلش مشاكلهم أن حضرتك بتطلع تخطب عند الاتحاديه لاهلك وعشيرتك وسايب الناس فى التحرير وكانهم إعداء ليك مشاكلهم أنهم قالوا يسقط حكم العسكر وحضرتك رجعته تانى وبالدستور كمان مشاكلهم أنهم بيقولوا محاكمة القتلة وحضرتك قولتلهم مفيش مشكلة وضحكت عليهم بنائب عام جديد بيقولك مفيش محاكمات جديدة غير بأدله جديدة وهى عند الداخليه اللى حضرتك رافض تنضفها مشاكلهم فى حاجات تانيه كتيير ..........يا ريت تسمعها ومتصدقش تقارير الاخوان اللى بتجيلك يا سيادة الرئيس ...إعلم أنك رئيس جمهوريه مصر العربيه بإخوانها وسلفييها وليبراليها وعلمانييها ومسيحيها .. يا سيادة الرئيس كن أنت الاكثر ذكاءا من جماعتك ...خد الناس كلها فى حضنك وبلاش حد يستعديك أكتر هتاف زعلنى جداا إمبارح الشعب يريد إسقاط النظام ....يا سيادة الرئيس صمتك عن الاحداث يرفع سقف مطالب الثوار أتفقت معهم أو اختلفت لكنها حقيقة ومتصدقش اللى يقولك الشعب كله فى جيبنا.
