السيسى : ولاء الجيش لمصر وشعبها فقط

قال الرئيس عبدالفتاح السيسي، موجهًا حديثه لقوات الجيش المصري، قائلاً: "أقول للجيش والشرطة إحنا اتكلمنا كتير في الولاء ومعندناش ولاء مذهبي أو طائفي أو سياسي أو حتى ولاء للرئيس.. ولاء لمصر وشعبها بس".
وأضاف "الرئيس"، خلال كلمته بالندوة التثقيفية، المنعقدة الآن بمسرح الجلاء، "هفكر الجيش والشرطة تاني من 5 سنين اتطلب مننا ومني شخصيا أن نسمح بدخول فئات معينه للجيش، وقولت مش هينفع حد يدخل الجيش المصري غير اللي مالوش توجهات دينية .. إنسان مسلم بس أو مسيحي بس ومحدش هيدخل الجيش أبدًا إلا المصري فقط"، مُضيفًا: "وطول ما أنا موجود محدش هيخش فيه وده اللي حمى مصر.. ببساطة لو ناس ليها توجه هيوقف مع توجهه".
وتابع: "الجيش والشرطة اللي ليه توجه يخليه بعيد عن الدولة، ولو فيه توجه داخل أي مؤسسة من مؤسسات الدولة غصب عنه بيميل لتوجهه مش بيشوف مصلحة بلده وبيشوف مصلحة الفئة والتوجه التي يعتقده وده أخطر حاجه"، مُضيفًا: "أنا مش بتكلم على الجيش والشرطة بس أي مؤسسات من مؤسسات الدولة جواها توجهات، وكنت حريص إني لا أستعدي مواجهة مع حد للحفاظ على ثبات مصر".
واستطرد: "فيه ناس ليها توجهات موجودة في المؤسسات وده مش كويس لبلدنا وشعبنا لا في الجيش أو الشرطة أو أي مؤسسة يا إما يكون مع بلده أو بلاش، لكن جوه الجيش لا يمكن هنسمح إن يبقى فيه حد جواه كده، واللي هيبان عليه هنمشيه، وده أمر من أكتر من 30 سنة وده السبب الحقيقي اللي خلا الجيش ده جيش مصر وليس جيش حد".