أسعاد يونس : أهي كلها خيابة

علقت الفنانه اسعادة يونس كعادتها على ماحدث من اعتداء على الفنانين وسبهم علنناً من خلال قلمها الذى لا يمل ابداً من الدفاع عن الحق ومناشدة من يستطيع تصحيح الاوضاع وهذا بالفعل ما قامت به من خلال مقالها التالى الذى يحمل عنوان " أهى كلها خيابه " قائله :
يا أخي اللى يعيش ياما يشوف.. و كل ما يكبر يشوف اكتر.. و يورد عليه من الأصناف الأعجب و الأفكه.. ويلتفت وراه و يقول يا ما الواحد كان جاهل و مش مدرك و البعيد إمّعة.. أديني عرفت معلومة مهمة نزلت علي قلبي بردا و سلاما و لاقت من نفسي القبول و الارتياح و أثلجت صدرى لحد ما بقي بيتكتك م البرد.. فقد علمت مؤخرا ان هناك فتوى بجواز سب الناس و شتمهم
ولعن سنسفيل ابو اللي خلفوهم بدعوى جواز اغتياب المجاهرين بالمعصية لأنه يدخل فى التوصيف الشرعي لهم.. فاضللي بس إني استوثق من فضيلة الإمام الطيب شيخ الأزهر الشريف عشان نصدق عالرخصة دى و ننطلق بقي.. يا سلام؟؟.. داحنا مستنيين على تكة.. فإذا كان الإسلام يحث علي أدب الحديث و حسنه و عدم فظاظته أو تنفيره و ذلك تأكيدا علي نشر الدين و ليس تطفيش الناس منه و تكفيرهم بفعل الغباوة.. ورأيت شخصا يكسر كل هذه القواعد فى العلن و الجهر و على مسمع و مرأى من ملايين المواطنين.. من حقي أن أغتابه و أصفه من واقع سلوكه.. يعني إذا زعّق و أرغي و أزبد و شوُح بإيديه و طجن فى الكلام و لم يحترم لا سن و لا مقام و لا تاريخ و لا نيلة و اعطي قفاه لمن يحدثه و سب و لعن حتى شيوخ أجلاء من حقي أن أصفه بالوقاحة.. او المش متربي.. او قليل الأدب.. أما إذا هدد و توعد بتصريحات تهدد الأمن العام و سلامة الناس و استقرار البلد و إثارة الفوضي و أفصح عن تجميعه لآلاف بل ملايين من الأتباع و المريدين فى حال قيل كلام لم يعجبه فإنه يدخل تحت التوصيف الشرعي للبلطجة بحيث وجب تقديم بلاغ للنائب العام فيه و المفروض أن يطبق عليه أول ما يطبق قانون الطوارئ المعد في الأدراج.. السؤال بقي.. ما حكمُه اذا ما عاير رئيس الجمهورية بأنه و فصيله انتخبوه و بالتالي هدده بأن عليه في المقابل ان يحذر اذا ما قبل اللقاء مع جموع الناس الذين امتهن كرامتهم و استباح حرمتهم و اتهمهم زورا بجرائم أخلاقية شنعاء و لوّح بأنه و جماهيره سيخرجون في ثورة لن يطفئها أحد.. و ماحدش حايعرف يلمهم؟؟.. ولا حتي الرئيس؟؟.. يتوصف بإيه؟؟.. أفتنا يا شيخ الأزهر .
..
الكلام للدكتور مرسي.. لأ لأ مش حاكلم فخامتك كرئيس جمهورية في الموضوع التافه اللي فوق ده طبعا.. لكن.. لا نستطيع أن ننكر أن العمل علي صعيد السياسة الخارجية لمصر بدأ يأخذ منحي جيدا.. و لكن.. السياسة الداخلية بعافية شديدة.. الحالة كرب في الداخل و هناك الكثير من القضايا الملحة المتعلقة بالمواطنين في شتي المجالات و الأنحاء.. هناك قضايا تثير الرأى العام كثيرة و حالات تغول من أعضاء الحزب الذى تنتمي اليه هو و حلفاؤه تحتاج منك إلي الكثير من الكونترول و السيطرة شريطة أن تكون لصالح الشعب بأسره.. فالعدالة أحد جناحي إسمكم.. و هي مفتقدة.. أما الحرية فهذا موضوع آخر يطول شرحه .
كما أطالب التيار الاسلامي بالأدب و التحضر و الارتقاء الي مستوي البلد الكبير الذى يحتوينا.. و إدراك أننا نعيش فى القرن الواحد و عشرين مش العاشر.. و ان منظرنا بتخلفنا ده بقي يكسف و يعر قدام العالم.. أطالب التيار الليبرالي بنفس الشئ.. فقد أصبح من الضروري و اللازم و الواجب على الجميع التعقل في الحرب الالكترونية التي يشنها الطرفان علي بعض.. يعني لا صفوت حجازى قال موضوع إنه عند رؤيته لأول مذيعة محجبة شعر ان الاسلام دخل مصر.. و لا الدكتورة اميمة السلاموني مستشارة الرئيس قالت ان من لم تختتن ناقصة دين.. بل بالعكس.. انا سمعتها فى مداخلة تقول العكس تماما.. يعني ست بتفهم و متحضرة.. الشرشحة اللى عملتوها على المواقع و الفيسبوك خسرتنا ارض كتير و شمتت فينا العوازل من اللجان الألكترونية الاخوانية المطلوقة علينا زى دبان الصيف دى.. اختار معاركك عشان تعرف تكسبها .
..
البلاغ الذى قدمه واحد محامي لوزارة الداخلية ضد ساقية الصاوي بدعوى ان فيه ناس بتعبد الشيطان فى العلن و الجهر كده في حفل عام اقيم فيها.. أحب أقول ان محمد الصاوي صاحب المكان متهم دائما من جموع الفنانين بأنه إخواني الهوي.. متيبس الفكر متشدد الأفعال شلولح.. يعني ماهواش سهل كده و متسيب عشان يحصل عنده الطقس ده.. بالإضافة الي إن هذه التهمة بقت حامضة و بايخة قوي وهبلة و مش كل شوية بقي حد يصدع نافوخنا بالهطل ده.. و لما نعوز نعمل نفسنا قيمين على المجتمع و نمشي نعمل محاكم تفتيش للبشر و نجيبلهم البلا علي صدرهم.. ما حبوكش نقلد النظام القديم فى خيابته و بواخته.. ثم.. الموضوع الأهم.. إيه موضوع السداح مداح اللي فى تقديم البلاغات ده؟؟.. بيتحقق فيها و الا لأ؟؟.. بيظهر منها بلاغات كاذبة و كيدية و الا لأ؟؟.. بيتعاقب صاحب البلاغ الكيدي او الكاذب و الا لأ؟؟.. هل تفصح الأجهزة عن صاحب البلاغ للبني آدم اللى بيتجرجر عالنيابة للتحقيق و الا بيتقاله من مجهول؟؟.. حقه فين لو طلع برئ.. حقه فى النيل من اللي بهدله و قرفه و قرف السلطات و عطل العدالة و كلف الدولة فلوس؟؟.. أى جهاز عدالة اللى ممكن يلاحق على كم التقيح اللي نضح عالناس ده؟؟.. و النبي اوعي حد يقوللي تاني اننا شعب متدين بالفطرة.. انا حاسة اننا كشعب لو اتعورنا.. نخر صديد .
تصريح للسيد وزير الإعلام يقول إنه لن يذيع الجزء الثاني من مسلسل الجماعة للكاتب العظيم وحيد حامد اذا كان فيه ما يسئ للإخوان!!!!.. طيب ده كده تمام قوي.. هذا تصريح واضح و صريح ان تليفزيون الدولة أصبح ملكا للإخوان.. يذيع ما يمدحهم و يمنع ما يسيئهم.. طب ما يمولوه الإخوان بقي.. بياخد ليه من فلوس الشعب؟؟.. ماهو الشعب مش الاخوان.. طب لو فيه عمل بيشتم اي فصيل تاني؟؟.. نذيع طبعا.. علي العموم نحن نبارك علي هذا القرار.. و النبي ما تذيع.. أمانة عليك يا شيخ ما تذيع.. إحنا كده كده ما بنتفرجش.. و المعلن ما بيعلنش.. و كثافة المشاهدة ما بتجيش.. و بالمناسبة بقي.. ياريت ما تذيعوش افلامنا.. رجعوهالنا مادام كمان ما بتدفعوش تمنها.. منتجين كتير قوي ليهم مبالغ طائلة عندكم و انا منهم.. و مادام التليفزيون بقي يتبع الاخوان.. يبقي من باب أولي يدفع حقوق الناس.. مش هى دى اخلاق الاخوان؟؟
السادة المسئولين عن الشرف و الذمة و الأخلاق و قطع يد السارق.. نما إلي علمنا ان فريقا منكم توجه للإمارات للإطلاع على احدث الطرق التي يمكن أن تغلقوا بها المواقع الإباحية.. هو فيه أباحة اكتر من سرقة عرقنا و حر مالنا و هدر الثروات المصرية و ثقافتها.. ياريت بنفس الشمللة تاخدولنا حقنا من القنوات التليفزيونية اللي بتسرق افلامنا كلها و منها قناة الإل سي دي و قناة البيت بيتك و غيرهم.. فقد ثبت انهم يذيعون أفلامنا سرقة من السيديهات المقرصنة و شرائط البيتاكام المهربة و يهدرون دم قلبنا في وضح النهار.. مش عارفين ناخد حقوقنا منين.. و مفيش دولة ف ضهرنا.. أى مسئول بنتوجه له شلاضيمه بتقع و يذبهل و مايعرفش يعمل حاجة.. ده غير المواقع اللي بتقرصن الأفلام عمال علي بطال عيني عينك مع إضافة الكثير من الآيات القرآنية و الأحاديث لتضفي شرعية ما على هذه المواقع.. وانتوا في الطناش الكبير.. بل إن بعضكم يحلل هذا بمنتهي الجهل و الغباء.. ثروة مصر الثقافية منحورة على مواقع النت و أولها المواقع الإسرائيلية يا سادة.. و الكالون اللي حاتقفلوا بيه المواقع الإباحية هو نفس الكالون اللى ممكن تقفلوا بيه نزيف الدم للصناعة الوحيدة اللي بنعرف نعملها فى ايامنا اللطيفة المعاقة دى.. ايه الغيبوبة المتعمدة دى؟؟؟؟؟؟؟.. ده مش جهل.. ده شررررر .
إلي الذين يهددوننا و يرعبوننا بإفلاس البلد قريبا.. لسه فيه أمل.. و لكنها سوف تفلس فى حالة الإدارة السيئة.. لو أدارها النظام الحالي كالعزبة سوف تفلس قطعا.. و الفلسانة المرة دى مالهاش قومة.
أوافق على التصالح مع رجال الأعمال.. ماعدا هؤلاء المتهمين بتهم سياسية و الذين أهدروا مال الدولة متعمدين بغرض الإفساد السياسي.. حتى لا يتحول الأمر إلي هواية من اي سياسي قادم يعتلي منصب من هنا و رايح.. إحنا طيبين آه.. بس مش هُبل..