حمزة نمرة يحقق مليون ونصف مشاهدة ب "مرايات" خلال أسبوع

حقق المطرب حمزة نمرة نجاحًا كبيرًا، بأغنيته الجديدة «مرايات»، واحتلت الأغنية المركز الأول في تريند يوتيوب الموسيقي، وذلك خلال أسبوع فقط من طرحها على هيئة فيديو كليب مصور عبر قناته الرسمية على موقع الفيديوهات الشهير «يوتيوب» وعلى جميع المنصات الغنائية الرقمية.


ووصلت أغنية «مرايات»، حتي الآن إلي مليون ونصف مشاهدة عبر اليوتيوب، وهي من كلمات محمود فاروق، ألحان حمزة نمرة، توزيع وميكساج أندريه مينا، جيتار حمزة نمرة، تنفيذ وتريات للعازف الأمريكي Steve Turner.


كلمات أغنية مرايات
مرايات والصورة عكس الصورة
عمري في المرايات
وسنين جوّه صورة
وشريط ذكريات
وشكلك الملخبط
وعقلك لما خطط
يتنطط قلبك يزقطط
لما قالتلك حبيبي
أحلامك مش مقاسك
لأ دي أكبر نمرتين تلاتة
عكس اتجاهك
ماشي وانت مش خايف كالعادة
مجنون معجون
بمية العفاريت محبوس
مستنني لحظة حظ
ينفتح فيها الفانوس
أيام ما كنت تقدر
تنام 8 ساعات
وتعدي ليلة كاملة
من غير ما تشوف كابوس
مرايات والصورة عكس الصورة
عمري في المرايات
وسنين جوّه صورة
وشريط ذكريات
كابوس اسمه الفلوس
عمّال يدوس
ياما فرّق حبايب
وياما غيّر نفوس
خلاك تشوف للدنيا وش
مش عامل حسابه
والواقع غصب عنك
بقى يقرا لك من كتابه
حياة تفاوضك تساومك
وشيء في شيء
تحاوطك تمضيك
تنازل عن كل شيء
ما خطرش يوم في بالك
إن الفراق ده فرض
وإن الزمن هَيدلق
أحلام كتير عالأرض
مرايات والصورة عكس الصورة
عمري في المرايات
وسنين جوّه صورة
وشريط ذكريات
في الأرض لفيت
ودورت شرق وغرب
والقلب بيقول
امتى هنرتاح يارب
غمّضت عينك
فتّحت لقيت الشعر شاب
فجأة لقيتك
في آخر صفحة في الكتاب
يا أيها الولد
ما بقاش فاضل كتير
لو ده اللقا الأخير
أشوف وشك بخير
هيوحشني لقاك
لو بعد ميت سنة
خد بالك من حبايبك
وأولهم أنا
مرايات والصورة عكس الصورة
عمري في المرايات
وسنين جوّه صورة
وشريط ذكريات
قناة الفجر الرسمية عبر «تيليجرام» لمعرفة أهم الأخبار العاجلة والحصرية لحظة بلحظة

انضم لقناتنا الرسمية على تيليجرام لمتابعة أهم الأخبار لحظة بلحظة

قناة بوابة الفجر الرسمية عبر «الواتساب» لمعرفة أبرز وأهم الأخبار لحظة بلحظة

انضم الآن للقناة الرسمية لبوابة الفجر الإلكترونية على واتساب