علاء مرسي ل الفجر الفني: دوري في "مرعي البريمو" لطيف وحبيته.. وهنيدي إنسان عظيم وقلبه طيب(حوار)

هو فنان من فناني جيل التسعينات، استطاع أن يظهر من خلال الأعمال التي شارك بها موهبته الفنية وأدائه البارع، وتمكن من جذب انتباه الكثيرين إليه منذ بداية مشواره، وظل مواكبا على تميزه طيلة سنوات فنه، وكان آخر ما عرض له هو فيلم "مرعي البريمو"، هذا الفنان هو علاء مرسي.
حاور الفجر الفني الفنان علاء مرسي، بعد نجاح دوره الذي أداه في فيلم "مرعي البريمو" الذي تصدر شباك التذاكر الأيام الماضية عقب عرضه في دور العرض السينمائية المصرية.

- مبارك نجاح الفيلم وتصدره شباك التذاكر.. هل توقعت نجاح العمل بهذا الشكل؟
أولا أنا سعيد جدا بنجاح الفيلم وتصدره شباك التذاكر جدا جدا وتوقعت طبعا لأن العناصر اللي فيه مؤهلة للنجاح والحمدلله ده فضل ربنا
- كيف كانت أجواء الكواليس بينك وبين محمد هنيدي؟
الكواليس بيني وبين محمد هنيدي كواليس فنية صداقة، عشرة عمر وأنا سعيد إن أنا اشتغلت مع محمد هنيدي وبتشرف إن أنا بشتغل مع محمد هنيدي وأنا شايف إن هنيدي نجم كبير في الوطن العربي، جمهوره يعني من كل الأعمار وغير كده إن هنيدي إنسان عظيم وقلبه طيب وخيِّر فأنا بشكره على إنه أتاح ليا فرصة إن أنا اشتغلت معاه.
- ما رأيك في التعاون مع المخرج سعيد حامد؟

التعاون مع المخرج سعيد حامد حاجة حلوة جدا، يعني أنا مبسوط جدا إني اشتغلت مع الأستاذ الكبير سعيد حامد مخرج مهم ويضيف لأي ممثل يشتغل معاه.
- لماذا صرحت أن دورك في مرعي البريمو لا يعتبر طموحك؟
أنا مقولتش طبعا إن دوري في مرعي البريمو لا يعتبر طموحي أنا مبقولش كلمة طموحي دي مقولتهاش مش عارف، أنا دوري في الفيلم لطيف جدا وحبيته وعملته وبس، أنا دخلت دلوقتي وبصيت، العنوان مش هو المعنى اللي انا متكلم فيه وكلمه بردو مش طموحي أنا مقولتهاش والكلام المكتوب ده متاخد من لقاء.


- ما السبب وراء تصريحك الأخير ب ندمك على تقديم الدور في مرعي البريمو ولو عاد بك الزمن لرفضته؟


لم أقل ذلك، أنا قولت أنه الفنان عمومًا لما بيتفرج على شغله بعد ما يتعمل بيتمنى لو عاد بيه الزمن أنه يعمله أحسن ده المعنى اللي أنا قولته.
- هل ارتبط قبولك الدور بتعرضك لضائقة مالية أم سبب آخر ؟
إطلاقًا، عمري ما بشتغل عشان ضائقة مالية.

- آراءك على السوشيال ميديا وجراءتك تعرضك أحيانًا للهجوم وتجعل بعض الناس تعتقد أنك تفعل هذا من أجل التريند.. فما تعليقك على ذلك؟
أنا مبتكلمش على السوشيال ميديا أنا بتكلم في الإعلام ومع صحفيين، في صحفي محترم وفي صحفي بياخد الكلام علشان هو يعمل تريند، إنما أنا لا بعمل تريند ولا بفهم في التريند، أنا لما بتكلم بقول آرائي.
- وهل هذا بسبب ابتعادك عن السوشيال ميديا؟
انا مش بعيد عن السوشيال خالص، أنا شايف إن السوشيال أصبحت في إيدين أي حد، فبالتالي النقد أصبح في إيدين أي حد، بالظبط زي الصحافة والإعلام.

- علمنا أن هناك مشروع يتعلق بموهبتك بالتأليف تتمنى عمله وسيترك بصمة كبيرة في الأعمال الدرامية فما الذي يعيقه للخروج إلى النور؟
أنا عندي فيلم كاتبه اللي هو "بين الحارات" ده فيلم مهم جدًا، لو اتعمل هيبقى حاجة كويسة.

- تشارك في عمل قادم مكون من 15 حلقة بعنوان "الليلة كبيرة" ما رأيك في الأعمال الدرامية الأقل من 30 حلقة؟

أشارك في العمل كضيف شرف، وإن الحلقات تبقى 15 حلقة أو 30 حلقة على حسب مادة الدراما وعلى حسب الحدوتة رايحة فين.
- ظهرت خلال التصوير للمسلسل ترتدي بدلة ونظارة وأجزم كثيرون أنك تشبه المخترعين فهل هذا التخمين يقارب دورك؟

فعلًا بعمل شخصية أحد المخترعين وكواليس العمل حلوة جدًا، والكواليس كانت لطيفة مع كل الناس.

- كيف كان العمل مع المخرج وسام مدني ؟
العمل مع الأستاذ وسام مدني عظيم جدًا ومخرج مهم وواعد.