علاء زينهم: "رفضت أتضرب قلم من سيد زيان.. ونفسي أشتغل مع ياسر جلال

حل الفنان علاء زينهم ضيفًا على برنامج "واحد من الناس" الذي يقدمه الإعلامي عمرو الليثي عبر قناة الحياة.

وكشف زينهم، عن إنه يحلم بأن يعود مرة أخرى لأن يسوق عربية نقل مرة أخرى ويسافر البحر الأحمر، لإنه يحب الشغل الحلال بحد وصفه ويربي أبنائه على هذا النحو.

وأضاف: "للأسف بقيت معنديش وقت للسواقة لأني كنت في أفخم فاترينه مع النجم عادل إمام، فكان المخرجين يشاهدوني بالليل في المسرح "الزعيم" وتاني يوم الاقيهم بيبعتولي أدوار".

وتابع: "من الأعمال التي أحبها النوم في العسل، والماء والخضرة والوجه الحسن، ويتربى في عزه، وونوس، والبرنس".

وتابع علاء زينهم: "مخرج "بوجي وطمطم" كان بيقولي طول ما أنا عايش أنت معايا في بوجي وطمطم، حتى بعد وفاته ابنه عمل بوجي وطمطم تاني وأخدني معاه".

خلاف علاء زينهم مع سيد زيان

وعن خلافه مع الفنان سيد زيان أوضح: "أنا كنت بمثل في مسرحية "العسكري الأخضر" وكان هناك مشهد المفروض إنه بيضربني فيه بالقلم وأنا رفضت، وتحدث مع سيد زيان لو ضربتني هاضربك وبعدها رفضوا استمراري وقولت ليهم ده آخر يوم ليا معاكم، واتقبلنا بعد كده وقالي لسه خايف مني ومش عاوز تشتغل معايا واتصالحنا".

كما تحدث عن موقف آخر قائلا: "هاني لاشين في مسلسل زعل مني لإني رفضت أضرب ابني وأنا مش بحب أضرب حد أو اتضرب، وأحمد زاهر لم يضربني في مسلسل البرنس، ومحمد سامي الله يكرمه أخد لي شوطات من زوايا مختلفة أعطت احساس بالقلم وستات في الشارع كانت تقابلني تقولي ازاى يضربك كده واحلفلهم أن ده تمثيل".

وقال: "الدكتور يحيى الفخراني الله يكرمه قالي متمثلش زي ما قالك أحمد صقر خليك بطبيعتك، في مسلسل زيزينا الناس هتحبك وفعلا كان هناك رد فعل حلو أو ي من الناس".

رفض دور مع إيناس الدغيدي

واستكمل أنه رفض دور متحرش مع المخرجة إيناس الدغيدي، واتناقشت معاها لمدة ساعة ونصف، وبالغت جدًا فى الاجر علشان ترفض تاخدني، ولما اتناقشت مع أولادي قالولي يابابا اوعى تعمل الدور ده الناس بتقابلك في الشارع هتقولك ايه.
كما قال الفنان علاء زينهم أنه اخد جائزة واحدة في حياته عن فيلم "الماء والخضرة والوجه الحسن"، وكان الدور ده هيعملوا الاستاذ صلاح عبد الله لكنه كان مريض.
وأوضح: اتصلت بالاستاذ صلاح عبد الله وقتها استئذانه قالي في ناس أصيلة زيك بتسأل، واعطاني نصايح وقالي الدور ده حلو أو ي ركز مع المخرج الأستاذ يسري نصر الله عنده فكر مختلف.

وأردف: كان نفسي اشتغل مع الاستاذ أحمد زكي لكن ربنا عوضني بإني اشتغلت مع هيثم ابنه، ونفسي اشتغل مع ياسر جلال لأني اشتغلت معاه في يتربى في عزو وكنت واخد عنه فكرة أنه رخم ومش جدع لكني لاقيته غير كده واني كنت ظالمه، وقولت ليه أنا كنت ظالمك.

حل مشكلة عضويته للنقابة

وأضاف: استاذ صلاح السقا صاحب فضل عليا وهو اللي كان سبب اني اخد عضوية النقابة، وكانوا رفضين لانب شغال موظف، وكنت قاعد مع سليمان عيد على القهوة، وكان أحمد السقا جاي ياخده بالعربية، وسليمان قالي ما تكلمه فقلت ليه أنا ما اعرفوش قالي كلمه بس هو بيحبك، وفعلا خرجت وسلم عليا كأنه يعرفني من سنين وقولت ليه على موضوع العضوية فأعطاني رقم تليفون البيت وقالي كلم بابا هو بيحبك وبيشوفك، وفعلا كلمته على طول من تليفون القهوة وأول ما قولت ليه أنا علاء زينهم قالي ازيك ياد عامل ايه وحكيت ليه مشكلتي قالي خلاص اعتبره خلص، وفعلا تاني يوم كلمني وعملي الكارنيه ومضى الناس اللي كانت رافضة عضويتي ومش ممكن أنسى فضله عليا.