في ذكرى ميلاده.. تعرف على اللقاء الأول بين نور الدمرداش وكريمة مختار

تحل اليوم ذكرى ميلاد المخرج والفنان نور الدمرداش، الذي يعد واحدًا من أهم صناع الدراما المصرية، فقد أخرج العديد من الأعمال الناجحة والتي تعتبر بصمة في تاريخ الفن المصري.

في إحدى اللقاءات التليفزيون كشفت الفنانة كريمة مختار، عن قصة التعارف واللقاء الأول بينهم حتى ذهابه لمنزل أهلها، قائلة: "كنت بدرس في المعهد العالي للفنون المسرحية، وكان شكلي صغير جدًا وليا ضفاير ولبسي باين عليه إني تلميذة مش ممثلة وبلبس حاجات تلفت النظر لأني دخلت المعهد لحبي الشديد للفن وكنت بدرس موسيقى وتمثيل، ومكنتش ببص لشباب خالص ولا يهمني في شئ.

وأضافت كريمة مختار: " نور الدمرداش كان يسبقني بسنوات لأنه كان وقتها في سنة رابعة وأنا كنت في سنة أولى، وهو كان ظابط في سلاح الفرسان وخريج جامعة وله بعض المواصفات بتخلي الناس تبصله وكانت البنات تقعد تتفرج عليه، لكن أنا الحقيقة كنت بخاف منه جدًا، وكده كده انا بعيدة خالص عن الموضوع ده".

وتابعت كريمة مختار: " لغاية لما اتقابلنا في مسلسل إذاعي وكان عامل دور شرير واتكلمنا من خلال العمل شوية وهنا بدأ التعارف، ولكن أنا في البداية مكنتش موافقة لأنى كنت أسمع أنه شقى ولعبي، ولكن ده كان غير صحيح ومش لازم نصدق كل الكلام اللي بيقولوا الناس لأن الأيام أثبتت أن كل الكلام اللي اتقال عليه غير صحيح تمامًا".

واستكملت، كريمة مختار: " المهم جم يزورونا وانا قايلة عندي في البيت اني مش موافقة ولكن والدتي قالتلي دول ضيوف اطلعي سلمي بس عليهم وكده وخلاص، ولما شوفت والدته وافقت عليه على طول لأن لما شوفت والدته قولت مش ممكن يكون ابن الست دي شخص يكون وحش أبدًا وده كان سبب تراجعي عن الرفص وموافقتي على الزواج منه".