بعد إيقافة.. ننشر التفاصيل الكاملة لأزمة تامر أمين وأهل الصعيد

تصدر الإعلامي تامر أمين "تريند" محرك البحث الشهير جوجل، عقب دخوله في أزمة مع أهل الصعيد، بتصريحات صرح بها عند حديثه عن الزيادة السكانية وافنجاب.
أزمة تامر أمين
ودخل تامر أمين في أزمة كبيرة مع رواد مواقع التواصل الاجتماعي، الذين تداولوا تصريحاته التي مست أهل الصعيد ليلقى سيلاً من الشتائم والتغليقات السلبية.
بداية أزمة تامر أمين
وبدأت الأزمة عبر برنامج "آخر النهار" الذي يقدمه تامر أمين عندما قال: "في الريف وفي الصعيد فيه نسبة كبيرة جدا بيخلفوا أولاد وبنات مش عشان يصرفوا عليهم ولا عشان يدخلوهم التعليم ويتعلموا ويكبروا ويتوظفوا أو يبقى عندهم فرص عمل، لا ده بيخلفوهم عشان العيال دي هي اللي تصرف على الأب والأم".
تصريحات تامر أمين
وأضاف تامر أمين في برنامجه: "فيه أسر كتير كتير قوي بيخلف الولد وأول ما الولد ده يبقى عنده 5 أو 6 سنين 7 سنين بالكتير، يقوم هوب راميه على ورشة ورشة سمكرة، حداداة، دوكو، إصلاح سيارات.. يشتغل فواعلي.. يشتغل في البنا.. يشتغل في المعمار.. المهم يشتغل واللي بنسميه إعلاميا بلية.. عارفين الواد بلية.. اللي هو صبي المعلم وصبي الأسطى.. فيروح والأسطى آخر الشهر يديله 500 جنيه أو 1000 جنيه أو 700 جنيه.. ماهو واد صغير 7 سنين.. وياخد الواد الصغير الألف جنيه ويعمل إيه.. يروح يرميهم في حجر أبوه.
تامر أمين وفتيات الصعيد
واستطرد تامر أمين حديثه قائلاً: "طب جاني بنت.. هغلب؟ لأ.. هدخلها المدرسة؟.. لا.. أول ما تبقى 8 أو 9 سنين أشحن تشتغل في البيوت.. وفيه أزمة في القاهرة والإسكندرية والمحافظات الكبرى في الخادمات والعاملات في المنزل.. فاشحن فالبنت لا تستمتع بطفولتها وبالبراءة بتاعتها ويطلع عنيها.. وياسلام لو ست البيت بتكهربها ولا بتلسوعها ولا بتعمل بلاوي سودا من اللي بنسمع عنها وبتشغلها 24 ساعة وبتديها آخر الشهر ألف جنيه..وتجري أخر الشهر تحطهم فين في حجر أبوها"، ليلقى سيلاً من التعليقات السلبية التي نالت منه.
استعال أزمة تامر أمين
واشتعلت أزمة تامر أمين بعد هذه التصريحات، ليس فقط مع أهل الصعيد، إنما مع كافة رواد مواقع التواصل الاجتماعي، الذين طالبوا بإيقاف برنامجه، أو إقالته ومنعه من الظهور بالقناة، لما رأوه من كلمات قاسية، رآها البعض أنها تنال من سمعة فتياتهم.
رد تامر أمين
وحاول تامر أمين احتواء الأزمة، ونشر إيضاحاً لموقفه على حساب الصفحة الرسمية لقناة النهار، قال فيه :"حبيت بس أعمل الفيديو ده بسرعة لأني لقيت حالة من حالات التضخيم والاصطياد في الماء العكر وفيه محاولة للوقيعة بيني وبين الجماهير، خصوصا حبايبنا وأخواتنا وأهالينا في الصعيد والريف".
تبرير تامر أمين لتصريحاته
وأضاف تامر أمين: "حبيت أعمل الفيديو ده للتوضيح عشان نقطع الطريق أمام الناس اللي بتصطاد في المية العكرة.. الناس خدوا كلامي اللي بتكلم فيه عن مبادرة السيد الرئيس عبدالفتاح السيسي لوقف الزحف السكاني والتصدي للزيادة السكانية وحاولوا يصوروه على أني بهين أهالينا في الصعيد والريف".
تفاصيل أزمة تامر أمين
وتابع الإعلامي تامر أمين منشوره قائلاً: "أولًا قبل ما نخش في التفاصيل لا أنا ولا غيري يجرؤ انه يهين الصعايدة أو أهلنا في الريف والفلاحين، لأني مقتنع أن الصعيد ده شرف مصر وعزة مصر وكرامة مصر وأصل مصر وكل القامات الثقافية والشعرية والحضارية والأدبية والسياسية طلعت من الصعيد والريف.. ثانيًا لأن أنا أصلا فلاح من الريف وأبويا أصلا من محافظة ريفية زراعية وبالتالي محدش بيهين نفسه".
تامر أمين يهاجم الجزيرة
وهاجم الإعلامي تامر أمين "الجزيرة" قائلاً :"أنا بقول لقناة الجزيرة اللي نزلت هذا الكلام، هيهات الناس كويسة قوي والصعايدة والريف وأهل الريف والفلاحين عارفين مين هو تامر أمين وأنا كمان عارف أهلي وبلدي واللي جزمتهم على راسي من فوق"، في محاولة لتخفيف الأزمة.
إيقاف تامر أمين
من جانبه، قرر الدكتور طارق سعدة نقيب الإعلاميين، إيقاف تامر أمين عن ممارسة النشاط الإعلامى على أى وسيلة إعلامية وإحالته للتحقيق، بناء على تقرير المرصد الإعلامى التابع للنقابة، الذى أكد مخالفة المذكور لميثاق الشرف الإعلامي ومدونة السلوك المهني، والحديث بطريقة مرفوضة عن أبناء الصعيد الشرفاء، حسبما جاء في البيان.