أعرب الفنان محمد هاني، عن سعادته بالمشاركة في مسلسل "الاختيار"، الذى يتناول قصة حياة الشهيد أحمد صابر المنسي، قائد الكتيبة 103 صاعقة، الذى استشهد فى كمين "مربع البرث"، بمدينة رفح المصرية عام 2017، أثناء التصدي لهجوم إرهابي في سيناء. وكشف محمد هاني في تصريح خاص ل"الفجر الفنى" أن تجربته في مسلسل الاختيار غير أي شيء آخر في حياته، معبراً عن ذلك قائلاً: "المسلسل ده بالذات مختلف في كل حاجة المود وإحساس اللوكيشن كمان لأننا بنصور في أماكن حقيقة سواء كتيبة 103 اللى كان فيها القائد منسي أو في صحراء أو في الهايكستب طبعا شعور مختلف لأي ممثل إنه يكون دايما شايف عساكر و ظباط جيش خلتني أحس قد إيه عمل وطني ومهم جدا لأن اهتمام كل كرو العمل والناس كان غير طبيعي".
وتابع: " تم ترشيحي عن طريق أستاذ إبراهيم فرج الكاستنيج دايركتور وأستاذ خيري سالم المخرج المنفذ أكيد بيرجع لدكتور بيتر ميمي وتم اختياري والحمد لله كانوا مبسوطين وبيشجعوني جدا جدا".
وأشار هاني أن من أصعب المشاهد تكون المداهمات التى دخلوا فيها من أجل الحصول على عنصر تكفيري أو عندما يقتحم مبني والمشاهد التى فيها تدريبات وركوب مدرعة، مضيفاً أن الفنان أمير كرارة من أجمل الشخصيات التى ممكن أن تقابلها في حياتك سواء علي المستوي الإنساني والفني، يحترم الصغير قبل الكبير، معبرا عن ذلك قائلا: "وافتكر أول مرة اشوفه كان في الكرفان بتاعه وحفظنا المشهد سوا وكان مبسوط جدا بيا وهو اللى خلي دكتور بيتر ميمي يركز معايا والحق يقال اداني طاقة إيجابية وشجعنى كتير أوي وبجد بشكره علي حسن التعامل و الشياكة في كل حاجة هو يستاهل كل خير والله".
وعن استعداده للدور قال: "إحنا زي ما بيقولوا اترمينا من الدار للنار فجأة بقيت اصحي أروح الجيش معايشة مع العساكر واللوكيشن والطابور و تدريبات الصاعقة طبعا خلوني اخش في الشخصية جدا وكمان كان فيه عناصر من الجيش بيدربونا علي مسك السلاح والتعامل بيه وعلي الأوضاع المختلفة لضرب النار وطرق المداهمات وطريقة المشي بالسلاح والرقود كل حاجة اتعلمناها في التصوير مع كلامي لعساكر حقيقة قدرت أحس هما بيحسوا بإيه بقيت مركز في عينيهم وطريقة كلامهم وبقيت بخش اكلمهم بنفسي كلهم أبطال وولاد بلدي ويارب أكون قدرت أوصل احساسهم ومشاعرهم بصدق لإن دي أقل حاجة ليهم".
واختتم حديثه قائلاً: "التجربة أثرت في حياتي بشكل إيجابي جدا عرفت قيمة اللى بيعمله ابطالنا في الجيش وقد إيه الحياة بره ترفيه جداً جداً عن الحياة داخل الجيش حسيت إن واجبنا كلنا نوصل الصورة دي للناس إن فيه عساكر و ظباط بيضحوا بأرواحهم عشان نعيش في آمان ويمكن بسبب التصوير أنا بعيد عن أهلي بقالي فترة كبيرة ولكن كنت حاسس إني في مهمة وطنية وعمل للتاريخ وشرف ليا إني اشتغلت في مسلسل الإختيار وبشكر ربنا إنه اداني الفرصة دي".
يذكر أن مسلسل "الاختيار" يشارك في بطولته بجانب أمير كرارة كلا من أحمد العوضي، دينا فؤاد، سارة عادل، ضياء عبد الخالق، وتأليف باهر دويدار وإخراج بيتر ميمي، وإنتاج شركة سنرجي
ويشارك أيضاً مجموعة من النجوم كضيوف شرف فى أحداث مسلسل الاختيار، الذى تدور أحداثه فى إطار تشويقى، وعلى رأسهم آسر ياسين، محمد إمام، كريم محمود عبد العزيز، ماجد المصرى، محمد رجب، صلاح عبد الله، إياد نصار، أحمد وفيق، كريم عبد الخالق، وآخرون .
