دايمًا قبل أي خروجه بتسأل أصحابك هنروح فين؟ وبيبقى الرد المعتاد زي ما أنت تحب، وطبعا أنت لو كنت عارف هتخرج فين مكونتش سألت من الأساس وأخدت القرار من نفسك، بس أنا هحاول أساعدك شوية باني أطرح عليك شوية أفكار لخروجات مختلفة علشان تكسر الروتين بتاع الحياة، وعلشان متبقاش الخروجات مملة. 1- نادي التنمية - شيراتون من أفضل الخروجات المختلفة واللي مش هتكلفك أي حاجة هو نادي التنمية، الدخول ب10 جنيهات، وهتقدر فيها تلعب أي حاجة أنت عايزها زي بينج بونج، إسكواش، وكلها بأسعار لا تُذكر ولو رايح مجموعة كبيرة ممكن تحجزوا ملعب وتلعبوا كورة، سلة، فيه العاب إلكترونية، وفيه كمان أرخص بولينج ممكن تلعبه ب10 جنيهات، وهتلاقي كمان كافيتريا تشرب اللي أنت عايزه، وتراك كبير تقدر تتمشى أو تجري فيه.. وزيه بالظبط الIBC المركز الدولي للبولينج هو أكثر احترافية في البولينج بس أغلى شوية. 2 - footpark - التجمع الخامس بتعرف تلعب كرة؟ طب ورينا.. "فوت بارك" هي أول مدينة ملاهي خاصة بكرة القدم، ممكن تلعب 16 تحديا مختلفا بجوائز فورية وقيمة تصل لبلاستيشن 4.. التحديات هي : العارضة، التصويب داخل السلة، قوة التصويب، الركلات الثابتة نحو الهدف، دارتس كرة القدم، كونيكت فور، كرة التنس الطائرة، فوت باسكت، وحاجات تانية كثير. 3 - Escape Room دي عبارة عن متاهات، أنت بتدخل أوضة أنت وأصحابك ومفروض بتقعد جوه الأوضة دي 60 دقيقة وبتبقى محتاج تخرج قبل الوقت ده ما ينتهي، يعني بتحتاج أنك تكون لماح، وأنك تستغل كل حاجة موجودة في الأوضة علشان تخرج منها قبل نهاية الوقت، كل أوضة ليها فكرة وكلها بتختلف من مكان للتاني، وفيه أماكن فيها أكثر من فكرة.. أنا مش هقول على مكان معين .. أنت ممكن تدخل تدور بنفسك وتختار المناسب بالنسبالك.. بس دي مكلفة شوية يعني فيه أماكن ممكن تكلف الشخص الواحد 120 جنيها وفيه أماكن أقل من كدة وفيه أماكن أكثر، ودي ممكن تشيل لحد 6 مثلا. 4- جرافيتي كود - التجمع الخامس ومول مصر مكان كبير أوي فيه ترامبولين في كل حتة، تفضل تتنطط في كل مكان، وكله كور، وتفضل تلعب لحد ما تقول حرمت، على ما اتذكر يوم ما لعبتها الأول دخلت مكان فيه اثنين بس انت من ناحية والتاني من الناحية التانية وتفضلوا تنقلوا لبعض الكرة، وبعدها مكان واسع كدة كله تنطيط وشقلبظات للصبح يا معلم، وفي الآخر عملنا زي ماتش كدة واحنا عمالين نتنطط، تجربة مختلفة ولو روحت عدد هيبقى الموضوع لطيف، سعرها زيادة عن ال100 جنيه. 5- الألعاب الهوائية - المقطم فيه راجل أجنبي عايش في مصر اسمه ماريو عمل العاب الحبال جوه دير سمعان الخراز بالمقطم، 4 ألعاب مش موجودين في أي مكان بالقاهرة إلا هناك.. ألعاب صعبة وممتعة في نفس الوقت، حاجات مختلفة وبتتراوح أسعرها بين 50 ل100.. الألعاب عبارة عن أنك هتطلع على برج وتتربط بحبل وبعدها هتنزل لتحت، وتتسلق الصخور، وهتمشي على الحبل والجسر، وهتطلع الجبل وتتنقل بالحبال، وكل الألعاب مؤمنة.
