مصري يرد على دعوات خلع الحجاب بموقف في "أمريكا" من 13 عام

رد مواطن يدعى جاسر زاهر، على دعوات خلع الحجاب بشكل جماعي فى ميدان التحرير تحت مسمى استرداد الكرامة، بموقف حدث معه منذ 13 عاما في أمريكا، حيث قال: مراتى و بنتى كانوا فى مصر و راجعين و رحت استقبلهم فى مطار نيويورك و قدامنا 5 ساعات سواقة تقريباً لغاية مانوصل البيت".

وأضاف خلال صفحته على فيس بوك:" أول ما مسكنا طريق السفر مراتى قررت إنها تقلع حجابها عشان تهوى نفسها شوية بعد رحلة طيران 12 ساعة و خصوصاً ان التوقيت كان بعد المغرب و الدنيا ضلمة و محدش تانى معانا، قطعنا تقريبا نص المشوار و فجأة لقيت أنوار عربية بوليس ورايا لانى كنت متجاوز السرعة و دة اشارة ليا انى اقف و قد كان".

وأردف: ركنت العربية و النظام هنا ان لما الموقف دة يحصل لازم تنتظر فى عربيتك لغاية ضابط البوليس مايكشف على نمر العربية على اللاب اللى فى عربيته و يتأكد إن العربية مش مسروقة و بعدين بينزل يجيلك و يشرحلك هو وقفك ليه، مراتى ساعتها دورت على الحجاب و كأنه فص ملح و داب و انا بصيت فى المراية لقيت الضابط نزل فعلاً من العربية و فى طريقة لعربيتى و ساعتها قررت انى اعمل حركة غبية جداً و هى انى انزل من عربيتى و أول ما ده حصل الضابط اخد خطوة لورا و سحب سلاحه و صوبه ناحيتي و طلب منى ارجع عربيتى فوراً و إلا ابقي بديله الحق يتصرف، قلتله بسرعة أنى مسلم و إن مراتى فى العربية من غير حجابها و أنى مش عايزه يشوفها فى المنظر ده، حسيت إن الضابط ساعتها هايضربنى بالنار بعد اللى قلتهوله و خصوصا إن احنا كنا بعد أحداث 11 سبتمبر بفترة قصيرة لكن لقيت الضابط قالى أنا متفهم جداً لطلبك و مش هاجى لغاية العربية بس من فضلك سيب رخصتك و رخصة العربية على الشنطة و أنا أول ما اخلص المخالفة هاخبط على الشنطة عشان تنزل تاخد الرخص و المخالفة".

واختتم المنشور الذي تداول بكثرة على فيس بوك: افتكرت الموقف دة وصعب عليا حالنا اللى وصلنا ليه".