حكاوى مصراوى: بنتي شعرها خشن!

البنات الصغيرين دايما بيقارنوا نفسهم ببعض و بياخدوا بالهم من كل حاجة و ساعات الأم بتلاقي نفسها في موقف ضعف لما بنتها تيجي تقولها ماما... أنا شعري خشن! ... فتحتار الأم و تفضل تسأل عن أفضل وسائل فرد الشعر عشان تحاول "تجمل" شعر بنتها حرصا منها علي نفسية البنت طب السؤال هنا...هل هو ده الحل؟ و هل هي كدة فعلا بتساعد بنتها؟
• الحقيقة ان أفضل هدية ممكن الأم تديها لبنتها هي الثقة بالنفس لأن البنت دلوقتي شعرها "بس" هو الي مضايقها و افترضنا ان الأم هتعرف "تعالجه" لكن بكرة هتيجي في مشكلة أكبر مثلا و ممكن الأم متعرفش تتصرف فيها... ممكن البنت مثلا تقول أنا عاوزة يبقي عندنا العربية الفلانية زي فلانة و تبقي العربية دي مش في متناول ايد الأم... هيبقي الحل ايه ساعتها؟

• مينفعش أبدا أن البنت تستمد ثقتها بنفسها و سعادتها من مظهرها بالعكس لازم تتعلم أن اه مهم أهتم بشكلي لكن مينفعش يبقي هو ده مصدر اعتزازي أو قيمتي عند نفسي... و ده برضو لازم الأم تعلمه لبنتها من خلال القصص الحقيقية و الحوار.

• لازم الأم متجاريش بنتها في كل حاجة لأن في طلبات طبيعية و لكن في حاجات حتي لو هتبقي صعبة علي البنت بس لازم تتعلم تواجهها و زي ما أحدي الأمهات كانت بتقول "شدي علي بنتك... الدنيا مش بتستني علي حد".

• مهم قوي كمان أننا نعلم أولادنا ميبصوش لحد و يبقوا مبسوطين بالي معاهم و لو الأم شعرت في يوم من الأيام أن بنتها بتقارن نفسها بحد تاني مفيش مشكلة أنها تسمعها وتديها مجال تفضفض و تقولها أنها مقدرة مشاعرة و فعلا شعر فلانة حلو بس أنتي كمان فيكي كذا و كذا و أصلا أحنا كدة كدة بنحبك و ده المهم!

• لازم البنت دايما تبقي عارفة المميزات الي فيها و الحاجات "العادية" الي فيها برضو و لازم تعرف تقيم نفسها صح و ده بيجي دايما عن طريق سؤال البنت مثلا ايه رأيك في الطريقة الي كتبتي بيها الواجب ده؟ طب في جزء ممكن يتحسن؟

• طبعا ساعات البنات بيضايقوا بعض بسبب الشعر فأولا علمي بنتك أنها ترد عن نفسها و متسمحش لحد يعلق عليها بطريقة سخيفة و ممكن أنتي تروحي تتكلمي مع المدرسة و تتفقي معاها علي التصرف الي ممكن المدرسة تاخده و طبعا يا ريت يكون ده بدون علم بنتك.

• احذري أنك تنتقصي من البنات الي شعرهم ناعم عشان تخالي بنتك تستريح أنهم فيهم العيوب الفلانية أو أنها أحسن منهم في كذا... أنتي كدة وقعتي في المقارنة و بطريقة سلبية كمان... بلاش نربي نفوس مش صافية عند الأطفال و لكن الحل أنك متذكريش فلانة أو علانة ركزي علي بنتك و مميزاتها بشكل عام و أنك بتحبيها.

• لازم بالذات في تربية البنات أنه يكون علاقتك ببنتك قوية و في بينك و بينها حوار اسمعيها كويس دايما أما تيجي تتكلم و احكيلها عن مواقف شخصية انتِ مريتي بيها...صحبي بنتك!

• طبعا مفيش أي مانع أني أحاول أشوف تسريحات مناسبة لطبيعة شعر بنتي و كريمات و زيوت و كمان الإكسسوارات الي ممكن أحطها في شعرها , حاجات كلها في نطاق الطبيعي و من غير ما أحسس البنت أننا في مشكلة أو أننا بنمر بأزمة و علي فكرة الانترنت ماليان تسريحات تناسب نوعية كل شعر دوري و كمان اسئلي معارفك و أصحابك.

• و في النهاية قرار فرد شعر بنتك أو لا باستخدام الكيراتين أو المواد المشابهه قرار خاص بيكي لكن لازم برضو تتأكدي من أن المواد المستخدمة آمنة تماما علي بنتك و لازم تعرف كويس مدة مفعولها و بالتوفيق!