خيانة في الحلال

أنا من مدة طويلة فكرت أبعت مشكلتي واترددت كتير علشان عارف أني هلاقي هجوم فظيع لكن قررت أني أبعت لأني متأكد ان فيه رجالة كتير في وضعي ، أنا زوج من حوالي ست سنين وبعد قصة حب ومازال الحب أنا بعترف لكن في نفس الوقت مش قادر امنع نفسي من تعدد علاقاتي بستات تانية .. أنا بشوف نفسي وبحس بروحي لما أتعرف على ست جديدة وتكون في حياتي بحس أني متحمس ومقبل على الدنيا خصوصا لما أكون متخانق مع مراتي .. بحس أني مش بكبر واني ممكن ألاقي واحدة أكون شخص جذاب بالنسبالها خصوصا ان العلاقة الزوجية بيفتر فيها شوية مشاعر مهمة بعد مرور سنين كتير وده بيضايقني وبيحسسني أني بعجز أو مش محل رغبة أو شغف .. صحيح مراتي بتحبني وأنا متأكد من كدة وبصراحة بتبادلني مشاعر جميلة لكن مش بحسها منها زي في اول جوازنا بحس ان كلامها الحلو ليه بقت تأدية واجب أو اعتياد بس مش اكتر .. لكن علاقتي بالاخريات دايما بتحسسني بنفس درجة اللهفة اللي كنت بحسها من مراتي في اول جوازنا ، عارف أني غلطان لكن مش قادر أعيش بدون إحساس اللهفة اللي قصدته .. وده عمره ما هيتوفر مع زوجة قضيت معاها سنين لكن دايما بيتوفر مع ست أنا في حياتها إنسان جديد وهية كمان ، أنا مش بقول هروح أتجوز واحدة تانية لأني أكيد مش هقدر لكن بقول محتاج افضل في حالة تجديد علاقات كل شوية ، عارف أنكم هتقولوا علية مجنون أو ظالم أو حتى بطران على زوجتي وحياتي لكن والله أنا بتكلم بكل صراحة ومحتاج لحل برغم تمسكي بفكرة الخيانة المقصودة أو الخيانة الحلال زي ما بسميها بيني وبين أصحابي على سبيل الهزار .. لما ابتدت تصرفاتي مع مراتي تتغير غصب عني من كتر العلاقات دي ابتديت أخاف على بيتي وعلى علاقتي بزوجتي الرائعة وفي نفس الوقت مش قادر أبطل ده وتهت بين عقلي ورغباتي وقلبي بجد تايه ونفسي في نصيحة لوجه الله .. أسف أني طولت عليكم وشكرا جزيلا .
[email protected]