هاتي بوسة بقى !

سلام على الناس الكويسة
الحمد لله انا مبسوط في جوازي يمكن علشان لسة عريس بس عندي مشكلة واحدة لغاية دلوقتي .. وهية أني بحب قبل النوم وزوجتي جنبي نتكلم شوية أو يحصل شوية مداعبات خفيفة وبعدين قبلة حنونة وننام ، لكن زوجتي بحس أنها بترفض .. مش بترفض مباشرة لكن بتقولي سيبني أنام انا مرهقة أو تتهرب من الموضوع وهية فعلا شكلها بيبقى نايم لكن انا حابب ان ده يبقى طبع فينا علشان قدام شوية ومع مرور سنين الجواز يفضل بينا حاجات تحيي اللي الزمن ممكن يبوظها لا قدر الله ، بعدين انا من الرجالة اللي بحب دايما أدلع مراتي وأقول ليها كلام حلو ده بيسعدني انا نفسي قبلها وأكيد هيساعدني على تخطي اي خلاف في يوم ، دي قناعاتي واحتياجاتي بس مش عارف أوصلها أزاي لمراتي من غير ما احس بنفور أو رفض منها ، هية كويسة معايا طول اليوم أو الأوقات اللي بشوفها فيها بعد ما ارجع من الشغل وبالعكس هية رقيقة جداً وبتقابلني كويس .. إلا في موضوع النوم ده .. يمكن لانها بتحب النوم عموما هوة شيء مقدس عندها خصوصا أنها بتصحى بدري تفطرني ومش بتنام بعدها .
تفتكروا الحل إيه بعد إذنكم .. وشكرا جزيلا .
ع . ا

فضفضة
محررة الصفحة .. نيفين حجازي
سيدي الفاضل .. لقد تكلمت على عادات ليت كل الرجال والنساء أيضاً يهتمون ويحرصون على وجودها بين الأزواج فهي تمحوا الكثير من حالة التوتر التي تصيب البعض نتيجة ضغوط الحياة ، اقترح عليك ان تقص على زوجتك ما قصصته لنا بما تحمله من مشاعر لكن يمكنك ان تبدأ معها قبل دخولها الى النوم بفترة قصيرة ربما يختلف رد فعلها تماماً وفي الوقت نفسه يزيد رصيدك عندها عندما تشعر انك تقدر تعبها طوال اليوم لتتركها تعيش طقوسها قبل نومها كما هي ترى ، وانبهك الى شيء شديد الأهمية وهو ان لكل إنسان طقوس يعتاد عليها ويفضل البقاء عليها .. فانت نفسك بالقطع لديك طقوسا تخص طبيعتك والتي تستمتع بتنفيذها يوميا ولا يوجد لديك اي استعداد لتدخل احد بها ، لذلك .. قم انت أيضاً باحترام عادات الطرف الثاني ولا تخرب على نفسك ما من عليك به الله من نعمة وهي الاستقرار مع زوجتك لسبب يمكنك التكيف عليه خاصة وإنني لا أقول لك لا تفعل هذا .. بل تقدم بالوقت قليلا لترى رد الفعل الذي تحلم به . وفقك الله لما فيه كل الخير ان شاء الله .
[email protected]