سنه 1952 في زمن الفن الجميل كانت شادية كل العصور تغني لكمال الشناوي في مشهد رومانسي عظيم سوق علي مهلك سوق بكرة الدنيا تروق سووووووق..الملحوظ من الغنوة انها شكلها كانت عاوزاة يفضل سايق وميوقفش يمكن علشان العربية كانت كابرولية تجنن. كانت كل الاشياء انيقة كتير منا يتمني يكون في هذا الزمن في اوج كل المشكلات والحروب والاحتلال كل الناس بما فهم الفقراء لهم رونق مختلف ، استايل بلغتنا الحالية اسمعوا من معاصري هذا الزمن هاتعرفوه. من تاريخه حتي احداث 18 و19 يناير 1977 ما يسمي انتفاضة الخبز في عهد السادات و احداث الامن المركزي فبراير 1986 في عصر مبارك هي اشهر الاحداث التي اتسمت بالعنف المفرط للطرفين -من وجهه نظري - فيما عدا ذلك وحتي ثورة 25يناير 2011 لم يحدث ابدا ان كنا بمثل هذه الغوغائية ولاهذا الخلل. الجمعية الوطنية للتغيير فكرة انطلقت 2010 اسسها البرادعي واخدت تحت مظلتها تيارات كتير كلها كانت بتقول انها معارضة لنظام مبارك علي حد ما عرفنا عنهم في الوقت ده منهم حزب الغد حزب الجبهة الديمقراطية حزب الوسط المصري حزب الكرامة الاشتراكيون الثوريون حزب العمل المصري مصريات مع التغيير حركة شباب 6 أبريل الحزب الشيوعي المصري الحملة الشعبية لدعم البرادعي ومعاهم الاخوان المسلمون –المقال مش عنهم متقلقش خالص- ركز كده هما دول برضوا المعارضة دلوقتي. مايسترو التغيير في هذا التوقيت جاب الشباب الي مبيعرفش يسوق خالص وكل واحد اخد الكورس التمام وفي وقت قصير جدا كل واحد قدر يركب العربية ويسوق ويسابق ويجري بيها كمان ،كلنا شايفين قد ايه قدره الشباب بعد ما اتعلموا يطلعوا بالعربية امريكاني ومفيش حد منهم منتبه ان الامريكاني ده بيعمل تراب كتير خالص ورا العربية يعمي عنين الناس الي ماشيين في الشارع. اتعلمتوا السواقه جميل...طلعتوا رخصه...ومالة....بس للاسف قيمتها ايه الرخصة والطلعه الامريكاني ان مكنتش عارف وانت سايق دواسة الفرامل دي لزومها ايه؟ حد قالك ان ليها لازمه؟ حد فهمك انك وانت بتسوق لازم تكون عارف امتي تفرمل قبل ما تلبس فالحيط؟ ولا تاخد مواطن غلبان ع الكبوت لمجرد انك مدستش علي الفرامل في الوقت المناسب!! ومن هنا افتكرت شادية وهي بتغني سوق علي مهلك في رساله بسيطة لكل التيارات المعارضة الي رافعه شعار الثورة مستمرة والحكومة الي رافعة شعار الدولة مستقرة غنوه عميقه فيها رسائل كتير مثلا قالت "انا هابعت لك وانت ابعت لي علي حركاتك كشف حساب" مش دي الشفافية الي اتهرينا كلام فيها؟ شادية بتتكلم عن الشفافية والمحاسبة من 1952 واحنا سنه 2013 بنزقل بعض بالطوب علي باب الجامعة والوزارة بتتفرج علينا. ووجهت الدلوعة سؤال مهم لانصار المعزول (كان في عنينا وملو ايدينا وبعد دقيقة مش بايدينا) طب مانتوا معملتوش حاجه وهو في ايديكم – الحكم يعني – بتزعقوا ليه دلوقت ..والله عندها حق ماهو برضوا محدش عارف هايفضلوا سايقين فيها لحد فين برافوا شادية. الرسالة الاهم كانت في قولها (بكرة الورد اللي زرعناه يكبر طول مااحنا بنرويه) ايوه قالت كده واظن ان الكلام موجة للشعب الغلبان الي هايفضل يشتغل علشان ياكل عيش ،الطرف الوحيد الي طريقة مفهوم ومعروف وجايز يكون الطرف الوحيد الي هاتفضل رخصته سارية ورجلة ع الفرامل منتبة عاوز يعيش وشايف قدامه كويس معاك ولا ضدك مش مهم المهم انه محدد اتجاهه كويس وعارف هايقف فين ولمين. لكل الناس الي عارفة طريقها كويس شادية بتقولك سوق علي مهلك سوق بكرة الدنيا تروق... اصبر يا شعب .
