ستات مصر تقرف

مساء الخير يا فضفضة
محدش يقول لي غلطان مبدئيا ,
طلقت مراتي من أسبوع استحالت الحياة كدة من الآخر ,,
مشكلتي باختصار الطلاق تم بسبب انها مصرة على اجراء عملية لتصغير اجزاء من جسمها وشد اجزاء أخرى مع العلم انها رشيقة ومش محتاجة وحتى لو محتاجة هية كانت عجباني كدة !!
هية فاكرة اني معترض علشان الموضوع مكلف لكن والله لأ .. كل الحكاية اني خايف عليها من البنج والمصايب اللي بنسمع عنها وهية فعلا مش محتاجة اي جراحة لأنها من النوع الموسوس على نفسه جدا .. مشكلتي دلوقتي ان أصدقائي وعيلتي بيلوموني على الطلاق ومصرين اني ارجع لها لكن اللي همة مش فاهمينه اني مشكلتي معاها طوال الوقت على أمور شبه كدة والوسواس اللي عندها بخصوص الشياكة والجمال والموضة واللبس ,, ماشي جميل انما هية بزيادة مش بعرف اتكلم معاها كلمتين عدلين على بعض او حتى مهمين إهتمامها بنفسها أكل دماغها ودماغي معاها .. وأمي بتقول لي إني بطران والبطران عيشته قطران .. وأني لو اتجوزت واحدة تانية هقرف من العكس وهوة الإهمال المبالغ فيه صحيح مش كل الستات النموزج ده أو ده لكن غالبية ستات مصر مش بيهتموا بنفسهم وياريت الستات صديقات فضفضة ما يزعلوش مني لكن هية دي الحقيقة , المهم .. انا دلوقتي محتار ارجع مراتي ونحاول نشوف مع بعض حل لأسلوب حياتنا ولا هناهد قلبي على الفاضي ؟ لأني حاولت كتير قبل كدة .. انا اللي مشجعني بصراحة وجهة نظر والدتي في الموضوع ومش هنكر كمان إني بحبها بس مش لدرجة إنها تاكل دماغي بالمنظر ده .
وشكرا جزيلا
حسن